مقبوضہ مغربی کنارہ – (مرکزاطلاعات فلسطین فاؤنڈیشن) مقبوضہ مغربی کنارے کے مختلف علاقوں میں گذشتہ رات اور آج منگل کے روز صبح سویرے یہودی آباد کاروں کی طرف سے وحشیانہ حملوں کا ایک نیا سلسلہ دیکھا گیا ہے، جس میں نابلس اور رام اللہ کی گورنریز میں فلسطینی شہریوں کی زمینوں اور ان کی املاک کو نشانہ بنایا گیا ہے۔ یہ حملے فلسطینی دیہاتوں اور آبادیوں پر ہونے والی مسلسل جارحیت کا حصہ ہیں۔
نابلس گورنری میں، یہودی آباد کاروں نے بقرہ گاؤں کی زمینوں میں واقع عین الدلبہ کے علاقے پر زبردستی قبضہ کر لیا ہے، یہ کارروائی مزید فلسطینی زمینوں پر غاصبانہ قبضہ جمانے اور علاقے میں یہودی آباد کاری کے اثر و رسوخ کو پھیلانے کے ناپاک منصوبے کے تحت کی گئی ہے۔
اس کے ساتھ ہی یہودی آباد کاروں نے نابلس کے جنوب میں واقع قریوت گاؤں میں فلسطینی کسانوں کی زرعی زمینیں چوری کر لیں اور ان کے اصل مالکان کو اسلحے کے زور پر وہاں جانے سے روک دیا، مقامی آبادی نے اس سفاکانہ کارروائی کو زمین پر زبردستی حقائق مسلط کرنے کی غاصبانہ پالیسی کا تسلسل قرار دیا ہے۔
دوسری جانب رام اللہ اور البیرہ گورنری میں، یہودی آباد کاروں نے رام اللہ کے مشرق میں واقع برقا گاؤں میں ایک فلسطینی گھر پر دھاوا بولا اور کئی گاڑیوں کی توڑ پھوڑ کی، جس سے املاک کو شدید مالی نقصان پہنچا اور مقامی شہریوں میں سخت تشویش کی لہر دوڑ گئی۔
علاوہ ازیں، یہودی آباد کاروں نے رام اللہ کے شمال میں واقع ترمسعیا قصبے کے مضافات میں ”ابو عواد“ خاندان کے گھر کے ارد گرد دھاوا بولا، جبکہ دیگر انتہا پسندوں نے شہر کے مغرب میں واقع شقبا قصبے میں متعدد گاڑیوں کو آگ لگا دی، جس کے نتیجے میں گاڑیاں جل کر راکھ ہو گئیں اور ان کے مالکان کو بھاری نقصان اٹھانا پڑا۔
یہ تمام حملے فلسطینی دیہاتوں پر یہودی آباد کاروں کی بڑھتی ہوئی غنڈہ گردی کے سائے میں سامنے آ رہے ہیں، جس میں شہریوں، ان کی املاک اور زرعی زمینوں کو مسلسل نشانہ بنایا جا رہا ہے، ان حالات میں عوامی سطح پر مزاحمت اور تصادم کو تیز کرنے کی پکار بلند ہو رہی ہے۔
