غزہ (مرکزاطلاعات فلسطین فاوؑنڈیشن )اسلامی تحریک مزاحمت [حماس] کے عسکری ونگ عزالدین القسام نے جمعہ کو کہا ہے کہ گذشتہ 24 گھنٹوں کے دوران اسرائیلی فضائی حملوں میں غزہ کی شمالی پٹی میں کم از کم 13 اسرائیلی اور غیر ملکی یرغمالی ہلاک ہو گئے ہیں۔
ہفتے کی صبح ایک حیرت انگیز اور غیر متوقع حملے میں حماس کے عسکریت پسندوں نے غزہ کی سرحد کے قریب اسرائیلی برادریوں پر یلغار کی اور راکٹوں کی بوچھاڑ کر دی۔ اس حملے میں 1,200 سے زیادہ افراد ہلاک ہوئے۔
اسرائیل نے کہا ہے کہ حماس نے 150 سے زائد افراد کو یرغمال بنا لیا ہے جن میں عام شہری اور سکیورٹی فورسز دونوں شامل ہیں۔
عزالدین القسام بریگیڈز نے ایک بیان میں کہا کہ اسرائیلی لڑاکا طیاروں کی طرف سے نشانہ بنائے گئے پانچ مقامات پر ‘غیر ملکیوں سمیت تیرہ قیدی’ ہلاک ہو گئے۔
اسرائیل نے 2.4 ملین افراد کی گنجان آباد مسدود شدہ غزہ کی پٹی پر ہوائی اور توپخانے کے حملوں کی بارش کی ہے – جس سے عمارات منہدم اور 1,500 سے زیادہ افراد شہید ہو گئے۔
غزہ میں حماس کے میڈیا آفس کے مطابق ہلاک شدگان میں کم از کم 500 بچے بھی شامل ہیں۔
عزالدین القسام بریگیڈز نے اس ہفتے خبردار کیا تھا کہ “ہمارے لوگوں کو بغیر انتباہ کے نشانہ بنانے پر ہر ایک کے بدلے ایک یرغمالی کو مار دیا جائے گا۔”
