چین (مرکزاطلاعات فلسطین فاوؑنڈیشن )چین کے سرکاری میڈیا نے جمعرات کو صدر شی جن پنگ کے حوالے سے کہا کہ بیجنگ اسرائیل اور حماس کے درمیان جنگ کو جلد از جلد روکنا چاہتا ہے۔ میڈیا رپورٹس کے مطابق انہوں نے مزید کہا کہ ان کا ملک تنازع کے دیرپا حل تک پہنچنے کے لیے عرب حکومتوں کے ساتھ مل کر کام کرنے کے لیے تیار ہے۔
میڈیا کا کہنا ہے کہ چینی صدر نے مطالبہ کیا کہ دونوں فریق فوری طورپر جنگ بندی کا اعلان کریں تاکہ تنازع کو پھیلنے یا قابو سے باہر ہونے سے روکا جا سکے۔
صدر شی نے یہ ریمارکس مصری وزیر اعظم مصطفیٰ مدبولی سے ملاقات کے بعد کہے جنہوں نے اس ہفتے چین میں ہونے والے بیلٹ اینڈ روڈ فورم میں شرکت کے لیے بیجنگ کا دورہ کیا۔
میڈیا کے مطابق شی نے مدبولی کو بتایا کہ چین غزہ میں انسانی امداد کی اجازت دینے کے لیے مصر کی کوششوں کی حمایت کرتا ہے۔ یہ 7 اکتوبر کو شروع ہونے والی جنگ کے حوالے سے چینی صدر کے پہلے بیانات میں سے ہیں۔
مصر اور امریکا نے کل بدھ کو جزیرہ نما سینا کے ذریعے پائیدار طریقے سے غزہ کی پٹی میں انسانی امداد پہنچانے پر اتفاق کیا۔
غزہ پر اسرائیلی بمباری جاری ہے، جس میں اب تک تقریباً 3500 شہید اور 12,000 سے زیادہ زخمی ہوئے ہیں، اس کے علاوہ پانی، خوراک اور ادویات کی کمی کی وجہ سے ایک انسانی تباہی بھی سامنے آئی ہے۔
