غزہ – (مرکزاطلاعات فلسطین فاؤنڈیشن) قابض اسرائیلی سفاک فوج کی جانب سے غزہ کی پٹی میں سیز فائر (یا جنگ بندی) کے معاہدے کی خلاف ورزیوں کا سلسلہ مسلسل 220 ویں دن بھی جاری رہا اور پورے علاقے میں رہائشی علاقوں اور بے گھر ہونے والے مظلوم پناہ گزینوں کے مراکز کو فضائی حملوں، توپ خانے کی بمباری، اندھا دھند فائرنگ اور عمارتوں کو دھماکوں سے اڑانے کا نشانہ بنایا گیا جو غاصب صہیونی دشمن ریاست کی طرف سے فلسطینیوں کی نسل کشی کا واضح ثبوت ہے۔
ان مہیب مظالم کے نتیجے میں خان یونس اور دیر البلح پر ہونے والے اسرائیلی حملوں میں 8 فلسطینی جامِ شہادت نوش کر گئے اور متعدد زخمی ہوئے جبکہ گذشتہ بمباری میں شدید زخمی ہونے والے دو شہری زخموں کی تاب نہ لاتے ہوئے شہید ہو گئے۔
ناصر میڈیکل کمپلیکس نے اطلاع دی ہے کہ غزہ کی پٹی کے جنوب میں واقع شہر خان یونس کے وسط میں رفح گیراج کے قریب ایک اسرائیلی ڈرون طیارے نے نہتے فلسطینیوں کو نشانہ بنایا جس کے نتیجے میں ایک شہری شہید اور متعدد زخمی ہو گئے۔
وسطی غزہ کی پٹی میں واقع شہر دیر البلح سے نامہ نگاروں نے بتایا کہ شہر کے وسط میں شارع البرکہ پر ہونے والے ایک اسرائیلی حملے میں ایک اور شہری شہید ہوا اور کئی دیگر زخمی ہو گئے۔
اسی طرح سٹیلائٹ تصاویر اور عینی شاہدین کے مطابق شہرِ غزہ کے جنوب مغرب میں واقع محلے تل الھوا میں احمد کیفے پر اسرائیلی بمباری کی وجہ سے متعدد شہری شدید زخمی ہو گئے۔
اس سے قبل طبی ذرائع نے بتایا تھا کہ دیر البلح شہر میں شہداء الاقصیٰ ہسپتال کے قریب ایک صدمہ انگیز اسرائیلی فضائی حملے میں 3 فلسطینی شہید ہو گئے ہیں۔
مقامی ذرائع نے تصدیق کی کہ قابض اسرائیل کے طیاروں نے ہسپتال کے قریب واقع ایک عوامی لنگر خانے (تکیہ طعام) کو نشانہ بنایا جس کے نتیجے میں دِیر البلح سے تعلق رکھنے والے احمد سالم ابو اسد اور جبالیہ کے رہائشی 34 سالہ عبدالرحمن احمد محمد محیسن اور ابراہیم ریان شہید ہو گئے۔
آج اتوار کی علی الصبح خان یونس میں رفح گیراج کے علاقے پر قابض اسرائیل کی وحشیانہ فضائی بمباری کے نتیجے میں ایک فلسطینی شہری عبداللہ احمد ابو مصطفیٰ شہید اور کئی دیگر افراد شدید زخمی ہو گئے۔
علاوہ ازیں شمالی غزہ کی پٹی میں واقع بیت لاہیا پر ہونے والے قابض اسرائیل کے ایک گذشتہ حملے میں زخمی ہونے والے شہری جہاد سلمان زخموں کی تاب نہ لاتے ہوئے شہید ہو گئے جبکہ ناصر طبی مجمع نے زخموں سے چور ایک اور شہری کی شہادت کا بھی اعلان کیا۔
میدانی صورتحال کی تفصیلات کے مطابق قابض اسرائیل کے توپ خانے نے خان یونس کے مشرقی اور جنوبی علاقوں پر گولہ باری کی جس کے ساتھ ہی شہر کے مشرق اور جنوب میں قابض فوج کی بکتر بند گاڑیوں سے شدید فائرنگ کی گئی جبکہ اسرائیلی توپ خانے نے وسطی غزہ کی پٹی میں واقع البریج کیمپ کے مشرقی حصوں کو بھی اپنے ہولناک حملوں کا نشانہ بنایا۔
قابض اسرائیل کی غاصب افواج فضائی و توپ خانے کی بمباری اور پناہ گزینوں کے علاقوں کو نشانہ بنا کر سیز فائر کے معاہدے کی مسلسل دھجیاں اڑا رہی ہیں اور اس کے ساتھ ہی نام نہاد یلو لائن (پیلی پٹی) کے اندر عمارتوں کو دھماکوں سے اڑانے اور مسمار کرنے کی کارروائیاں جاری ہیں جبکہ تجارتی سامان، انسانی امداد کی آمد اور مریضوں کے سفر کی منتقلی پر سخت ترین پابندیاں تاحال مسلط ہیں۔
فلسطینی وزارتِ صحت کے سرکاری ڈیٹا کے مطابق گذشتہ اکتوبر کی 10 تاریخ کو سیز فائر کے آغاز سے لے کر اب تک معصوم شہیدوں کی تعداد بڑھ کر 876 تک پہنچ گئی ہے جبکہ 2562 افراد زخمی ہوئے اور ملبے تلے سے 776 لاشیں نکالی گئی ہیں۔
فلسطینیوں پر ڈھائے جانے والے ان سنگین مظالم کے باعث سرکاری معطیات کے مطابق سات اکتوبر سنہ 2023ءسے غزہ کی پٹی پر جاری قابض اسرائیل کی اس وحشیانہ جارحیت اور سفاکیت کے نتیجے میں اب تک مجموعی طور پر شہداء کی تعداد 72,768 ہو چکی ہے جبکہ زخمیوں کی کل تعداد 172,664 تک جا پہنچی ہے۔
