بیروت – (مرکزاطلاعات فلسطین فاؤنڈیشن) جنوبی لبنان پر قابض اسرائیل کی فوجی جارحیت کی لہر میں اس وقت مزید تیزی آگئی جب عارضی جنگ بندی کی مسلسل خلاف ورزیوں کے تناظر میں متعدد قصبوں پر بیک وقت وحشیانہ فضائی حملے کیے گئے۔
مقامی ذرائع نے اطلاع دی ہے کہ ایک اسرائیلی فضائی حملے میں جبال البطم نامی بستی کو نشانہ بنایا گیا جبکہ ایک اسرائیلی ڈرون نے مجدل زون بستی پر حملہ کیا، اسی دوران زوطر الشرقیہ کے گردونواح پر بھی بمباری کی گئی۔
نیشنل نیوز ایجنسی کے مطابق قابض اسرائیل کے جنگی طیاروں نے علی الصبح سے اب تک زوطر الشرقیہ پر تین فضائی حملے کیے ہیں۔
قابض فوج کے طیاروں نے جبال البطم اور القلیلہ کے گردونواح پر مزید دو فضائی حملے کیے جبکہ جنوب کے مختلف علاقوں میں توپ خانے سے گولہ باری بھی ریکارڈ کی گئی، جو بیک وقت فضائی اور زمینی ہدف بنانے کے دائرہ کار میں وسعت کی عکاسی کرتی ہے۔
اسی تناظر میں مقامی ذرائع نے بتایا ہے کہ قابض فوج نے شمع اور القنطرہ کی بستیوں میں رہائشی بلاکس کو دھماکوں سے اڑا دیا، یہ ایک ایسی میدانی کشیدگی ہے جس کا مقصد شہری آبادی کے بنیادی ڈھانچے کو تباہ کرنا ہے۔
لبنانی وزارت صحت نے گذشتہ رات اعلان کیا کہ پیر کے روز جنوبی علاقوں پر ہونے والے اسرائیلی حملوں کے نتیجے میں چار افراد شہید اور 51 زخمی ہوئے ہیں۔
دوسری جانب قابض اسرائیلی فوج نے جنوب لبنان میں کارروائیوں کے علاقے میں مشکوک قرار دیے گئے فضائی اہداف کی جانب دفاعی میزائل داغنے کا اعلان کیا ہے، جبکہ اسرائیلی فوج کے ریڈیو نے ایک فوجی ذریعے کے حوالے سے بتایا ہے کہ حزب اللہ کے ڈرون حملوں کے بڑھتے ہوئے خطرے کے نتیجے میں یونٹ کمانڈروں کی صفوں میں شدید مایوسی پائی جاتی ہے۔
اسرائیلی فوج نے یہ اعتراف بھی کیا ہے کہ جنوب لبنان میں ایک بارود بردار ڈرون گرنے سے اس کا ایک فوجی شدید زخمی جبکہ دوسرا معمولی زخمی ہوا ہے۔
قابض فوج نے ایک علیحدہ بیان میں دعویٰ کیا ہے کہ اس نے ایک ہزار سے زائد ایسے بنیادی ڈھانچے کو تباہ کر دیا ہے جن کے بارے میں اس کا دعویٰ ہے کہ حزب اللہ نے انہیں اس کی افواج کے خلاف حملوں بشمول بارود سے بھری عمارتوں کے لیے استعمال کیا تھا۔
