برطانوی پارلیمانی وفد کا القدس کی بستان کالونی کا دورہ

برطانیہ کے رکن پارلیمان رچرڈ بورڈن کی سربراہی میں فلسطین کے دورے پر آئے پارلیمانی وفد نے مقبوضہ بیت المقدس کی بستان کالونی کا دورہ کیا، اس موقع پر فخری ابودیاب نے وفد کو اہل علاقہ کی مشکلات، ان کے تباہ حال گھر اور ان کی جگہ قائم کیے جانے والے باغ داؤد سے آگاہ کیا۔ اس موقع پر رچرڈ بورڈن نے اسرائیلی مظالم کی چکی میں پسنے والے بستان کالونی کے رہائشیوں کے ساتھ گہری ہمدردی کا اظہار کیا۔ بورڈن کے بہ قول برطانیہ اقوام متحدہ اور عالمی برادری کے قوانین کے مطابق القدس کو مقبوضہ علاقے سمجھتا ہے۔ صہیونی حکومت کو چاہیے کہ وہ اس بات کو مد نظر رکھے اور اہالیان القدس پر ڈھائے جانے والے مظالم فوری بند کر دے۔ انہوں نے مزید کہا کہ برطانوی وفد کے دورے کا مقصد بھی اسرائیل پر فلسطینیوں کے گھروں کی مسماری سے باز رہنے کا دباؤ بڑھانا ہے۔ وفد کے اراکین نے اس موقع پر اہالیان القدس کے ساتھ بھرپور اظہار یک جہتی کیا۔