مقبوضہ بیت المقدس – (مرکزاطلاعات فلسطین فاؤنڈیشن) القدس گورنری نے حالیہ عرصے کے دوران مسجد اقصیٰ میں رونما ہونے والی تیز رفتار پیش رفت کی سنگینی کے حوالے سے سخت خبردار کیا ہے۔ گورنری نے اشارہ کیا ہے کہ قابض اسرائیل کی مقتدرہ مذہبی اور سیاسی تقریبات کی آڑ میں مسجد اقصیٰ کے صحنوں میں نام نہاد جانوروں کی قربانی متعارف کروا کر اور چھاپہ مار کارروائیوں میں شدت لا کر وہاں نئے حقائق مسلط کرنے کی کوشش کر رہی ہے۔
ایک بیان میں بتایا گیا ہے کہ سنہ 2026ء کے آغاز سے اب تک مسجد اقصیٰ کے اندر قربانیاں لے جانے یا اس کے گرد و نواح تک پہنچنے کی دستاویزی طور پر آٹھ کوششیں کی گئی ہیں، جن کا مرکز پاس اوور کے پہلے اور دوسرے سیزن کے ایام تھے۔
بیان میں اس بات کی تصدیق کی گئی ہے کہ یہ تعداد سنہ 1967ء کے بعد سے اب تک کی سب سے زیادہ تعداد ہے، جبکہ یہ بھی بتایا گیا کہ تین صورتوں میں انتہا پسند آباد کار مسجد اقصیٰ کے بالکل قریبی دروازوں تک قربانی کے جانور پہنچانے میں کامیاب ہو گئے تھے، جس کے بعد انہیں مزید پیش قدمی سے روکا گیا۔
گورنری نے واضح کیا کہ سنہ 2025ء میں جانوروں کی قربانی کی تین کوششیں دیکھی گئی تھیں، جن میں سے دو کوششوں میں جانوروں کو مسجد کے اندر لے جا کر ذبح کرنے کی کوشش کی گئی، جبکہ تیسری کوشش میں قربانی کا خون آلود گوشت اندر لے جایا گیا تھا۔
گورنری نے آنے والے دنوں میں پیش آنے والی دو تقاریب کے حوالے سے انتباہ جاری کیا ہے جو جمعہ کے دنوں میں آ رہی ہیں، خدشہ ظاہر کیا گیا ہے کہ ان ایام میں مسجد اقصیٰ کے اندر چھاپہ مار کارروائیوں اور مذہبی رسومات کی ادائیگی میں مزید اضافہ کیا جائے گا۔
بیان میں واضح کیا گیا کہ پہلی مناسبت 15 مئی کو ہے جسے نام نہاد یوم القدس کہا جاتا ہے، یہ چھاپہ مار کارروائیوں اور مسجد کے اندر نام نہاد خود مختاری مسلط کرنے کی کوششوں کے لحاظ سے خطرناک ترین مواقع میں سے ایک ہے۔
اسی طرح 22 مئی بروز جمعہ کی طرف بھی اشارہ کیا گیا جو نام نہاد عید الاسابیع (شوووت) کے ساتھ ہم آہنگ ہے، جس سے قبل 21 مئی بروز جمعرات کو بھی بڑے پیمانے پر دھاوے کا امکان ہے۔ ان مواقع کو عام طور پر چھاپہ مار کارروائیوں میں تیزی لانے اور نباتی و حیوانی اشیاء اور قربانیاں اندر لے جانے کے لیے استعمال کیا جاتا ہے۔
گورنری نے عوام سے اپیل کی ہے کہ وہ مسجد اقصیٰ کی طرف مستقل طور پر رخت سفر باندھیں اور وہاں اپنی موجودگی (رباط) کو یقینی بنائیں، کیونکہ ان مذموم کوششوں کے سامنے یہی دفاع کی پہلی لکیر ہے، نیز اس سنگین صورتحال میں اہل مقدسین کی ثابت قدمی کو مزید مضبوط بنایا جائے۔
بیان میں اس بات پر زور دیا گیا کہ مسجد اقصیٰ کے معاملے کو مقامی اور بین الاقوامی میڈیا کی توجہ کا مرکز بنائے رکھنا انتہائی ضروری ہے، تاکہ دنیا کی دیگر معاملات میں مصروفیت کا فائدہ اٹھاتے ہوئے آباد کار گروہوں کو خاطر خواہ نگرانی کے بغیر مزید خلاف ورزیاں کرنے کی اجازت نہ مل سکے۔
