مغربی کنارے کی غیر آئینی حکومت کی پری وینٹو ملیشیا کا سفاکانہ کریک ڈاؤن جاری ہے، ملیشیا اہلکاروں نے طولکرم میں قدس پریس ایجنسی کے نمائندے سلیم تابہ کو اغوا کرلیا جبکہ الخلیل میں ایسی ہی ایک کارروائی میں رکن پارلیمان محمد الطل کے گھر میں زبردست توڑ پھوڑ کے بعد ان کے بھائی کو اٹھا لیا گیا۔ طولکرم میں ملیشیا کی جارحیت کا شکار ہونے والے نیوز ایجنسی کے نمائندے کی بیوی نے بتایا کہ ان کے گھر کو منہدم کرنے کے بعد ملیشیا اہلکاروں نے بغیر کوئی وجہ بتائے ان کے شوہر کو حراست میں لیے لیا۔ انہوں نے بتایا کہ ان کے گھر کی تفصیلی تلاشی بھی لی گئی اور کمپیوٹر و دیگر کاغذات کی جانچ پڑتال کی گئی۔ انہوں نے کہا کہ ان کے شوہر ایک محنتی صحافی ہیں جن کا فلسطینی اتھارٹی کے ساتھ کوئی مخاصمہ نہیں انہوں نے اپنے صحافی خاوند کی فوری رہائی کا مطالبہ کیا۔ دوسری جانب الخلیل کے جنوبی علاقے ظاہرہ میں فلسطینی رکن پارلیمان کے گھر پر دھاوا بولا گیا۔ اس موقع پر گھر میں بڑے پیمانے پر توڑ پھوڑ کے بعد ان کے 33 سالہ بھائی کو گرفتار کر لیا گیا۔ رکن پارلیمان محمد الطل نے کہا کہ ’’پریوینٹو سکیورٹی‘‘ کے عناصر نے ان کے اور ان کے بھائیوں کے گھروں کا محاصرہ کیا جس کے بعد ان کے بھائی کو تفتیش کے لیے طلب کر کے شہر کے وسط میں ملیشیا کے ہیڈ کوارٹر منتقل کر دیا گیا ہے۔ الطل نے بتایا کہ ملیشیا کی پریوینٹو فورس نے پچھلے چند ماہ میں ان کے بھائی کو تین مرتبہ اغوا کیا ہے۔ ان کے بھائی چند روز قبل ہی ملیشیا کے عقوبت خانوں سے رہا ہوئے تھے۔