غزہ – (مرکزاطلاعات فلسطین فاؤنڈیشن) قابض اسرائیلی فوج نے منگل کے روز بھی غزہ کی پٹی کے مختلف علاقوں میں توپ خانے سے گولہ باری اور فائرنگ کرکے جنگ بندی کی خلاف ورزی کا سلسلہ جاری رکھا۔
مقامی ذرائع نے بتایا کہ قابض فوج کے توپ خانے نے رفح کے مغربی علاقوں کو نشانہ بنایا، جبکہ اسرائیلی بحری کشتیوں نے جنوبی غزہ کی پٹی میں واقع شہر خانیونس کے ساحل پر شدید فائرنگ کی۔ اس دوران شہر کی فضاؤں میں اسرائیلی ڈرون طیارے نچلی پروازیں کرتے رہے۔
قابض فوج نے جبالیہ کے مغرب میں واقع برکہ ابو راشد کے قریب پناہ گزینوں کے مراکز پر فائرنگ کی، جبکہ قابض توپ خانے نے غزہ شہر کے مشرقی محلے ’زیتون‘ میں صلاح الدین اسٹریٹ پر واقع القدس بینک کے گردونواح پر گولہ باری کی۔
قابض اسرائیلی فوج غزہ کی پٹی میں جنگ بندی کے معاہدے کی مسلسل خلاف ورزی کر رہی ہے۔ یہ خلاف ورزیاں پناہ گزینوں کے ٹھکانوں پر فضائی اور توپ خانے کی گولہ باری، ’یلو لائن‘ کے اندر تباہی و بربادی کے آپریشنز، اور سامان، امداد اور سفر پر عائد پابندیوں کی صورت میں جاری ہیں۔
فلسطینی وزارت صحت کے اعداد و شمار کے مطابق 10 اکتوبر کو جنگ بندی کے آغاز سے اب تک شہداء کی تعداد 1072 تک پہنچ چکی ہے، جبکہ 3463 افراد زخمی ہوئے ہیں؛ اس کے علاوہ ملبے سے 799 لاشیں نکالی جا چکی ہیں۔
سات اکتوبر سنہ 2023ء سے شروع ہونے والی جارحیت کے نتیجے میں اب تک مجموعی طور پر تقریباً 73 ہزار 98 افراد شہید اور 1 لاکھ 73 ہزار 571 افراد زخمی ہو چکے ہیں، جو کہ غزہ پر قابض فوج کی جاری جارحیت کے بھاری انسانی نقصان کی عکاسی کرتے ہیں۔
