غزہ – (مرکزاطلاعات فلسطین فاؤنڈیشن) غزہ کی پٹی کے مشرقی علاقوں میں جاری سکیورٹی بحران کے تناظر میں مزاحمتی سکیورٹی کی ذیلی فورس “رادع” نے انکشاف کیا ہے کہ قابض اسرائیل کے لیے کام کرنے والے ایک مجرم گروہ نے غزہ شہر کے جنوب مشرق میں واقع الزیتون محلے میں 25 فلسطینیوں کو اغوا کر لیا ہے جن میں خواتین اور بچے بھی شامل ہیں۔
سکیورٹی فورس نے اپنے مختصر بیان میں واضح کیا کہ اس مجرم گروہ نے دولتہ اور السوافری علاقوں میں رہائش پذیر خاندانوں پر حملہ کیا اور ان کے کئی افراد کو اغوا کر لیا۔ یہ علاقے قابض صہیونی فوج کے براہ راست کنٹرول میں ہیں جس کی وجہ سے اغوا ہونے والوں کی شناخت اور ان کے ٹھکانے کے بارے میں درست معلومات حاصل کرنے میں شدید مشکلات کا سامنا ہے۔
یہ واقعہ ان علاقوں میں ایسے مجرم گروہوں کی سرگرمیوں میں اضافے کے دوران پیش آیا ہے جن پر فلسطینی حلقوں کی جانب سے یہ الزام عائد کیا جاتا ہے کہ وہ قابض اسرائیل کے سائے تلے کام کر رہے ہیں۔ ان کا مقصد اندرونی انتشار پھیلانا اور خاص طور پر غزہ کے مشرقی علاقوں میں عوامی مزاحمت کے مضبوط مراکز کو نشانہ بنانا ہے۔
“رادع” فورس نے ان غدار گروہوں کے خلاف عوامی سطح پر حفاظتی کمیٹیاں تشکیل دینے کی اپیل کی ہے۔ فورس نے زور دیا ہے کہ سماجی تنظیموں اور قبائل کو سکیورٹی اداروں کے ساتھ مل کر اس ناسور کا خاتمہ کرنا ہوگا۔
یہ پیش رفت خان یونس میں اسی نوعیت کے ایک آپریشن کے ایک دن بعد سامنے آئی ہے، جہاں مزاحمتی فورس نے ان مجرم گروہوں کے خلاف کارروائی کرتے ہوئے کئی ارکان کو ہلاک اور زخمی کر دیا تھا۔
گذشتہ ہفتوں کے دوران غزہ کے دیگر علاقوں میں بھی ایسے ہی واقعات ریکارڈ کیے گئے ہیں۔ وسطی غزہ میں المغازی کیمپ کے مشرق میں ایک مسلح گروہ کے حملے کے دوران چشم دید گواہوں کے مطابق قابض اسرائیل کے ڈرون طیاروں نے مداخلت کرتے ہوئے ان غدار عناصر کو تحفظ فراہم کیا، جس کے نتیجے میں کئی بے گناہ شہری شہید ہو گئے۔
دستیاب شواہد کے مطابق ایسے کئی مسلح گروہ غزہ کے مشرقی، شمالی اور جنوبی حصوں میں قابض فوج کے زیر کنٹرول علاقوں میں سرگرم ہیں۔ قابض اسرائیل ماضی میں ان میں سے بعض گروہوں کو مدد فراہم کرنے کا اعتراف بھی کر چکا ہے۔ یہ گروہ اعلانیہ طور پر مزاحمت کے خلاف دشمنی کا اظہار کرتے ہیں اور مزاحمت کاروں کو نشانہ بنانے کی دھمکیاں دیتے ہیں۔
مبصرین خبردار کر رہے ہیں کہ قابض اسرائیل کی عسکری کارروائیوں کے ساتھ ساتھ ان مجرم گروہوں کا بڑھتا ہوا کردار غزہ میں مزید سکیورٹی افراتفری پیدا کر سکتا ہے اور اہل غزہ کو درپیش انسانی اور سکیورٹی بحران کو مزید گہرا کر سکتا ہے۔
