تہران – (مرکزاطلاعات فلسطین فاؤنڈیشن) ایران کے سپریم لیڈر مجتبیٰ خامنہ ای نے اس بات پر زور دیا ہے کہ ان کے پیشرو اور والد علی خامنہ ای کا انتقام لینا ایک ”قومی اور ناگزیر مطالبہ“ ہے۔ انہوں نے کہا کہ ”دنیا بھر کے آزاد لوگ جلد ہی انتقام کے مشن کا ایک حصہ شروع کریں گے“۔ یہ بیاگذشتہ روز جمعہ کو سابق سپریم لیڈر کی ان کے آبائی شہر مشہد میں تدفین اور آخری رسومات کی تکمیل کے بعد سامنے آیا ہے۔
مجتبیٰ خامنہ ای نے ایک تحریری بیان میں جسے سپریم لیڈر کے ٹیلیگرام اکاؤنٹ پر شائع کیا گیا اور ایرانی میڈیا میں نشر کیا گیا، عہد کیا کہ ”شہید قائد اور ان دو حالیہ جنگوں کے تمام شہداء کے خون کا حساب مجرموں سے لیا جائے گا“۔
سپریم لیڈر نے پیغام میں کہا کہ آنجہانی سپریم لیڈر کے قاتلوں کو ”جان لینا چاہیے کہ انہیں ان کے جرائم کا حساب دینا پڑے گا“، انہوں نے مزید کہا کہ ”انتقام صرف میری یا دیگر حکام کی موجودگی تک محدود نہیں ہے“۔
مجتبیٰ خامنہ ای نے اس بات پر زور دیا کہ انتقام ”ہر صورت پورا ہونا چاہیے۔دنیا بھر کے آزاد لوگ جلد ہی شہید سپریم لیڈر اور دیگر شہداء کے قاتلوں سے انتقام لینے کے مشن کا ایک حصہ انجام دیں گے“۔
مجتبیٰ کا یہ پیغام اپنے والد سابق ایرانی سپریم لیڈر کی آخری رسومات کے موقع پر آیا ہے۔ ان کی تدفین کی سرکاری اور عوامی رسومات ایک ہفتے قبل تہران اور قم (ایران) اور نجف اور کربلا (عراق) کے شہروں سے شروع ہوئی تھیں اور جمعہ کو ایران کے مشرقی شہر مشہد میں اختتام پذیر ہوئیں۔
علی خامنہ ای کو 28 فروری کو جنگ کے پہلے دن ایک اسرائیلی-امریکی فضائی حملے میں شہید ہونے کے 4 ماہ بعد مشہد میں امام رضا علیہ السلام کے مزار میں دفن کیا گیا۔ یہ مزار زائرین کا مرکز ہے اور اس کا سنہری گنبد اور نیلی مسجد ایران کے نمایاں ترین مقامات میں شمار ہوتے ہیں۔
مجتبیٰ نے اپنے والد کی ہلاکت کے بعد 8 مارچ کو ایران کے سپریم لیڈر کا عہدہ سنبھالا۔ تب سے وہ عوامی طور پر سامنے نہیں آئے، لیکن انہوں نے کئی تحریری بیانات جاری کیے ہیں، جبکہ ایسی اطلاعات ہیں کہ وہ اس فضائی حملے میں زخمی ہو گئے تھے جس میں سابق سپریم لیڈر ہلاک ہوئے تھے۔
خبر رساں ادارے ’رائٹرز‘ کے مطابق، تہران میں اعلیٰ سطحی ذرائع کا کہنا ہے کہ مجتبیٰ اپنی چوٹوں سے صحت یاب ہو رہے ہیں، لیکن وہ اتنی مکمل صحت یابی حاصل نہیں کر سکے ہیں کہ عوامی طور پر سامنے آ سکیں۔ سکیورٹی ادارے بھی نئے امریکی حملوں کے خدشے کے پیش نظر ان کے عوامی ظہور کو محدود کرنے کی کوشش کر رہے ہیں۔
