مقبوضہ مغربی کنارہ – (مرکزاطلاعات فلسطین فاؤنڈیشن) مقبوضہ مغربی کنارے کے مختلف علاقوں میں قابض اسرائیلی فوج کی یلغار اور اشتعال انگیزی میں شدید اضافہ دیکھا گیا، جس کے دوران تجارتی مراکز پر چھاپے مارے گئے، شہریوں کو یرغمال بنایا گیا اور کئی شہروں و قصبوں کی اہم شاہراہوں کو بند کر دیا گیا۔
شمالی مغربی کنارے کے حالات کے حوالے سے بتایا گیا ہے کہ قابض اسرائیلی افواج نے طولکرم کے شمال میں واقع الشعراویہ کے علاقے میں صیدا، علار اور عتیل کے قصبوں پر دھاوا بولا اور اپنی فوجی گاڑیاں مرکزی شاہراہوں اور رہائشی محلوں میں کھڑی کر دیں، جبکہ اس دوران پیدل دستوں کی بڑی تعداد بھی تعینات رہی۔
مقامی ذرائع نے تصدیق کی ہے کہ قابض اسرائیلی فوج نے شہریوں اور گاڑیوں کی نقل و حرکت میں رکاوٹیں کھڑی کیں، متعدد نوجوانوں کو روک کر ان کے شناختی کارڈز کی جانچ پڑتال کی اور کئی دکانوں پر چھاپے مار کر مالکان اور وہاں کام کرنے والے ملازمین کو حراست میں لے کر ان سے فیلڈ انویسٹی گیشن کی، تاہم ابھی تک کسی باقاعدہ گرفتاری کی اطلاع موصول نہیں ہوئی۔
بیت لحم میں قابض اسرائیلی فوج نے شہر کے مغرب میں واقع قصبے الدوحہ پر یلغار کی اور بلقیس شادی ہال کے قریب پوزیشنیں سنبھال لیں، اس دوران مرکزی شاہراہ کو مکمل طور پر بند کر دیا گیا اور گاڑیوں کی آمد و رفت روک دی گئی، جس کے نتیجے میں علاقے میں سخت تناؤ پیدا ہوا اور شہریوں کے معمولاتِ زندگی معطل ہو کر رہ گئے۔
قابض اسرائیلی فوج نے مذکورہ قصبے میں کئی دکانوں کی تلاشی بھی لی، یہ کارروائی بلقیس ہال پر گذشتہ روز کیے گئے اس حملے کے تسلسل میں کی گئی جس میں ایک شہری پر تشدد کیا گیا تھا اور دیگر کو یرغمال بنا لیا گیا تھا۔
مقبوضہ بیت المقدس میں قابض اسرائیلی فوج نے شہر کے مشرق میں واقع قصبے العیزریہ کے علاقے المشتل سے شہری محمد ابو غالیہ کو اغوا کر کے گرفتار کر لیا، جبکہ مقبوضہ بیت المقدس کے شمال میں عطروت بستی کے قریب بیت حنینا کے مقام پر دو نوجوانوں کو حراست میں لے کر یرغمال بنا لیا۔
