برسلز (مرکزاطلاعات فلسطین فاوؑنڈیشن) یورپی یونین نے تقریباً نو ماہ سے جاری اسرائیلی جارحیت کے نتیجے میں غزہ کی پٹی میں جاری تباہ کن انسانی صورتحال سے خبردار کیا ہے۔
یورپی یونین کی خارجہ پالیسی کے سربراہ جوزپ بوریل نے جمعرات کو برسلز میں یورپی یونین کی کونسل کے اجلاس سے قبل کہا، ’’اقوام متحدہ کی سلامتی کونسل کی جانب سے منظور کردہ جنگ بندی قرارداد پر عمل درآمد ہونا باقی ہے۔‘‘
انہوں نے زور دیا کہ “انسانی امداد کو غزہ میں داخل ہونے کی اجازت ہونی چاہیے۔”
یورپی یونین کے عہدیدار نے کہا کہ “ہم غزہ میں صرف بھوک اور بمباری کا تسلسل دیکھ رہے ہیں ۔” انہوں نے مزید کہا، “فوجی کارروائی روکنا، غزہ کو مزید انسانی امداد فراہم کرنا اور سیاسی حل پر غور کرنا سب سے اہم مسائل ہیں۔”
اسرائیلی قابض فوج امریکی اور یورپی حمایت سے غزہ کی پٹی پر 265 دنوں سے نسل کشی کی جنگ جاری رکھے ہوئے ہے، جس کے نتیجے میں اقوام متحدہ کے اعداد و شمار کے مطابق 37,765 افراد شہید اور 86,429 زخمی ہو چکے ہیں، اور ساتھ ہی تقریباً 17 لاکھ باشندوں کو بے گھر ہونا پڑا ہے۔
