ابو عبیدہ: مزاحمت اپنے سفر پر ثابت قدم ہے، حساب ابھی باقی ہے

غزہ – (مرکزاطلاعات فلسطین فاؤنڈیشن) اسلامی تحریک مزاحمت ’حماس‘ کے عسکری ونگ القسام بریگیڈز کے نامور عسکری ترجمان ابو عبیدہ نے اس عزمِ صمیم کا اعادہ کیا ہے کہ متعدد قائدین کی شہادت کے باوجود فلسطینی مزاحمت اپنے مقدس راستے پر پوری قوت سے گامزن ہے۔ انہوں نے کڑکتی ہوئی آواز میں اس حقیقت پر زور دیا کہ قابض اسرائیل نے اپنے تخمینوں میں فاش غلطی کی اور زمینی حقائق کو پڑھنے میں بری طرح ناکام رہا ہے جبکہ انہوں نے خبردار کیا کہ حساب کی کتاب اس وقت تک کھلی رہے گی جب تک سفاک دشمن اپنے ایک ایک ظلم کا پورا پورا تاوان نہیں چکا دیتا۔

ابو عبیدہ نے اپنے میڈیا بیانات میں دوٹوک الفاظ میں کہا کہ غیور مزاحمت کا سامنا ایک ایسے کمینے اور کم ظرف دشمن سے ہے جو کسی بھی معاہدے کی حرمت کو تسلیم نہیں کرتا۔ انہوں نے واضح کیا کہ غاصب اور قابض اسرائیل اپنے تمام تر وعدوں اور ذمہ داریوں سے صاف مکر گیا ہے اور مظلوم و نہتے فلسطینی عوام کے خلاف اپنی بدترین نسل کشی اور جنگی جرائم کا سلسلہ مسلسل دراز کیے ہوئے ہے۔

جہاد و عزیمت کے اس تاریخی معرکے کے دوران جامِ شہادت نوش کرنے والے سرفروش رہنماؤں کا تذکرہ کرتے ہوئے ابو عبیدہ نے عقیدت کے پھول نچھاور کیے اور کہا کہ مزاحمت فلسطین کے غیور عوام، امتِ مسلمہ کے تمام شہدا اور جری قائدین کی قربانیوں کو ہمیشہ اپنے سینے سے لگا کر رکھتی ہے۔ انہوں نے ان لازوال ارواح اور ان کے پسماندگان و باہمت خاندانوں کو انتہائی عقیدت و احترام کے ساتھ سلامِ پیش کیا۔

القسام کے ترجمان نے شہیدِ قائد عز الدین الحداد کے بے مثال اور تاریخی کردار کو زبردست خراجِ عقیدت پیش کرتے ہوئے تصدیق کی کہ انہوں نے غزہ کی پٹی کے شمالی بریگیڈ میں دفاعی معرکوں کی نہایت جرات مندی سے قیادت کی تھی اور وہ سات اکتوبر سنہ 2023ء کے تاریخی و عظیم الشان حملے کی منصوبہ بندی کا ایک اہم حصہ تھے۔ اس کے ساتھ ہی انہوں نے شہیدِ قائد محمد عودہ اور مزاحمت کے ان متعدد سرکردہ رہنماؤں کی عظیم قربانیوں کو بھی یاد کیا جنہوں نے غاصب دشمن کی اس مسلط کردہ وحشیانہ جنگ کے دوران جامِ شہادت نوش کیا۔

ابو عبیدہ نے اس فولادی سچائی پر سخت زور دیا کہ عظیم قائدین کی شہادتوں سے حق و صداقت کی اس مزاحمتی تحریک کی رفتار میں کوئی کمی یا اثر نہیں پڑا بلکہ تحریکِ آزادی مزید توانا ہوئی ہے۔ انہوں نے جذباتی انداز میں اضافہ کیا کہ جہاد و رباط کے میدانوں اور شب و روز کی عسکری تیاریوں کی آغوش میں ایسے نئے قائدین نے جنم لیا ہے جنہیں تاریخ کے تلخ تجربات اور ماضی کی جنگوں نے کندن بنا دیا ہے اور وہ اب اپنے عظیم شہدا کے نقشِ قدم پر چلتے ہوئے عسکری تیاری اور غاصب دشمن کے خلاف فرنٹ لائن پر سینہ سپر ہو کر معرکہ آرائی کا سلسلہ جاری رکھے ہوئے ہیں۔

ابو عبیدہ نے قابض اسرائیل کے سفاک حکمرانوں کو براہِ راست للکارتے ہوئے ایک ہولناک پیغام بھیجا کہ اے اللہ کے دشمنو، ہمارے عظیم قائدین کو شہید کرنے کے بعد اب تم اپنے برے انجام اور رسوائی کی بشارتیں سننے کے لیے تیار ہو جاؤ۔ تم نے ان بزدلانہ کارروائیوں سے کچھ بھی حاصل نہیں کیا بلکہ اب بھی ایسے جری کمانڈر میدان میں موجود ہیں جو تمہاری بربادی کا سامان اکٹھا کر رہے ہیں اور تمہارے خلاف دن رات عسکری تیاری میں مصروف ہیں اور یہ غیور جانشین سرفروش شہدا اور فولادی مقاومت کے راستے سے ایک انچ بھی پیچھے نہیں ہٹیں گے۔

اسی تناظر میں القسام بریگیڈز کے ترجمان ابو عبیدہ نے غاصب دشمن کی مسلسل سفاکیت اور جنگی جرائم کے سامنے ثالثوں اور ضامنوں کے مبہم کردار پر گہرے سوالات اٹھائے۔ انہوں نے عالمی برادری اور ثالثی کا کردار ادا کرنے والوں کو جھنجھوڑتے ہوئے پرزور اپیل کی کہ وہ مظلوم فلسطینیوں یعنی “مظلوم و شکار” اور غاصب صہیونی دشمن یعنی “ظالم و جلاد” کو ہرگز ایک ہی ترازو میں تولنے کی سنگین غلطی نہ کریں۔

انہوں نے تمام ثالثی کاروں پر زور دیا کہ وہ مظلوم و مقہور غزہ کی پٹی کے حق میں ایک جرات مندانہ اور “تاریخی موقف” اپنائیں اور قابض اسرائیل کو اس بات پر مجبور کریں کہ وہ جنگ بندی معاہدے کی تمام تر شقوں اور اس کے نتیجے میں عائد ہونے والے تمام تر عالمی وعدوں پر سختی سے عمل درآمد کرے۔

ابو عبیدہ نے اپنے بیان کے آخر میں دوٹوک موقف اختیار کیا کہ موجودہ نازک ترین مرحلہ اس بات کا متقاضی ہے کہ غاصب دشمن کی جارحیت کو لگام دینے اور اسے اپنے وعدوں پر عمل کرنے پر مجبور کرنے کے لیے تمام تر اسلامی اور انسانی کوششوں کو یکجا کیا جائے۔ انہوں نے خبردار کرتے ہوئے کہا کہ غزہ کی پٹی پر جاری بدترین صہیونی جارحیت اور نسل کشی کے ہولناک مناظر کے بیچ اب عالمی مجرمانہ خاموشی اور غیر جانبداری کا مظاہرہ کرنا کسی بھی صورت میں قابلِ قبول نہیں ہے۔