مقام براق کے اسلامی آثار کا خاتمہ یہودیانے کی طرف پیش رفت ہے: بیتاوی

فلسطین کی مجلس قانون ساز کے رکن شیخ حامد بیتاوی نے کہا ہے کہ دیوار براق کے اسلامی آثار کو ختم کرنے کا یہودی منصوبہ بھی مقبوضہ بیت المقدس کو یہودی رنگ میں رنگنے کے ناپاک عزائم کا ہی ایک حصہ ہے۔ مسجد اقصی کے خطیب فلسطینی علماء رابطہ کمیٹی کےسربراہ بیتاوی کا کہنا تھا کہ اس منصوبے کا مقصد مسجد اقصی کےجنوبی کھلے صحن کو اکھاڑ کر دیوار براق کی اسلامی نشانیوں کو ختم کرنا اور اس کی جگہ یہودی عمارتیں تعمیر کرنا ہے۔ صہیونیوں کی جانب سے جاری جنگ میں حالیہ عرصے میں شدت آ گئی ہے۔ بیت المقدس کے رہائشیوں کے گھروں کو منہدم کرنا، شہر کی اسلامی شناخت ختم کرنا، شہریوں کے گھروں کو گرانا، فلسطینی کالونیوں کو ان کے اصل رہائشیوں سے پاک کرنا، فعال فلسطینی رہنماؤں کو القدس سے شہربدر کرنا سب اسی منصوبے کا حصہ ہیں۔بیتاوی نے فلسطینی قوم سے القدس کے اس بابرکت شہر کی مقدس نشانیوں کو مٹانے کے اس منصوبے کے اگے بند باندھنے کا مطالبہ کیا۔ انہوں نے قوم سے اسرائیل اور اس کے یہودیانے کے منصوبوں کے خلاف متحد ہونے کی اپیل کی، انہوں نے عرب اور اسلامی دنیا کے تمام حکمرانوں اور عوام سے مسجد اقصی اور بیت المقدس کی مدد کے لیے کردار ادا کرنے کی اپیل بھی کی۔ اپنے بیان کے آخر میں بیتاوی نے اسرائیل کے ساتھ ہر طرح کے بے سود مذاکرات کو فی الفور ختم کرنے کے ساتھ ساتھ کہا کہ اسرائیل ان مذاکرات کو اپنے جرائم کی پردہ پوشی کے لیے استعمال کر رہا ہے۔