محمود عباس نے ذاتی طور پر اسرائیل سے غزہ جنگ جاری رکھنے کی درخواست کی: لائبرمین

اسرائیلی وزیر خارجہ ایویگڈور لائبرمین نے اس بات کا ایک مرتبہ پھر اعادہ کیا ہے کہ فتح کے رہ نما فلسطین کے بزعم خود صدر محمود عباس نے اسرائیلی قیادت سے ذاتی طور پر درخواست کی کہ غزہ پر جنگ حماس کے خاتمے تک جاری رکھی جائے۔

عبرانی روزنامے “ہارٹز” نے اپنی جمعرات کی اشاعت میں لائبرمین کا ایک بیان نقل کیا ہے کہ “فلسطینی آپریشن لیڈ کاسٹ کے دوران اسرائیل پر جنگی جرائم کی بہتان باندھے نہیں تھکتے جبکہ فلسطینی اتھارٹی کے صدر محمود نے ذاتی طور پر اسرائیلی عہدیداروں سے رابطہ کیا اور انہیں حماس کے خاتمے تک غزہ آپریشن جاری رکھنے پر زور دیا۔

یاد رہے کہ گذشتہ برس اسرائیلی قیادت نے اس امر کا انکشاف کیا تھا کہ محمود عباس اور فلسطینی اتھارٹی کے چند دیگر عہدیداروں نے اسرائیلی حکومت سے حماس کے خاتمے تک غزہ جنگ جاری رکھنے سے متعلق انکشاف کئے تھے۔

اسرائیلی قیادت کی جانب سے یہ بیانات اس وقت سامنے آئے کہ جب رام اللہ اتھارٹی نے اقوام متحدہ میں انسانی حقوق کی بین الاقوامی کمیٹی میں رچرڈ گولڈ اسٹون کی رپورٹ پر ووٹنگ موخر کرانے کا مطالبہ کیا۔ اس رپورٹ میں یو این کمیشن نے اسرائیل پر جنگی جرائم کے ارتکاب کا الزام عائد کیا تھا۔