علمائے کرام مسئلہ فلسطین کو عوام تک پہنچانے میں کردار ادا کریں۔ فلسطینی وفد

کراچی (مرکزاطلاعات فلسطین فاوؑنڈیشن)جمعیت علمائے پاکستان کی جانب سے فلسطین سے پاکستان کے دورے پر آئے رہنماؤں کے اعزاز میں استقبالیہ کی تقریب کا انعقاد کیا گیا۔تقریب میں فلسطینی وفد نے خصوصی طور پر شرکت کی اور علمائے کرام اور اکابرین سے ملاقات کی۔

فلسطین فاؤنڈیشن پاکستان کی دعوت پر پاکستان کا دورہ کرنے والے تین رکنی فلسطینی وفد نے جہاد اسلامی فلسطین کے رہنما سید البرکہ کی قیادت میں استبقالیہ تقریب میں شرکت کی جہاں ان کا استبقال جمعیت علمائے پاکستان کے رہنما ڈاکٹر عزیر محمود، علامہ قاضی احمد نورانی، شکیل قاسمی، عبد الوحید یونس اور دیگر نے کیا۔ فلسطینی وفد میں مجلس علمائے فلسطین کے صدر شیخ ادیب یاسر جی اور عالمی مہم برائے حق واپسی فلسطین کے سیکرٹری جنرل شیخ یوسف عباس جبکہ فلسطین فاؤنڈیشن پاکستان کے سیکرٹری جنرل ڈاکٹر صابر ابو مریم بھی موجودتھے۔
تقریب سے خطاب کرتے ہوئے فلسطینی رہنماؤں نے کہا کہ علمائے کرام کی ذمہ داری معاشرے کے عام افراد سے زیادہ ہے۔ علماء کی ذمہ داری ہے کہ وہ آج مسئلہ فلسطین سے متعلق عوام تک بھرپور معلومات پہنچائیں۔ ان کاکہنا تھا کہ فلسطین حق اور باطل کے درمیان کی لکیر ہے۔
تقریب سے خطاب کرتے ہوئے ڈاکٹر عزیر محمود نے کہا کہ شاہ احمد نورانی نے ہمیشہ مظلوم فلسطینیوں کے حق میں آواز بلند کی اور ہماری جماعت اور موجودہ قیادت بھی اسی مشن پر عمل کر رہی ہے۔
تقریب کے اختتام پر فلسطینی وفد نے علمائے کرام کو فلسطینی اسکارف کا تحفہ بھی پیش کیا۔