اسرائیلی حکومت نے فلسطینی اسیر کو رہائی کے بعد غزہ بدر کر دیا

اسرائیلی حکومت نے غزہ سے تعلق رکھنے والے فلسطینی اسیر کو مغربی کنارا بھیج دیا- فلسطینی وزارت برائے امور اسیران نے واضح کیا ہے کہ اسرائیلی حکومت نے غزہ کے رہائشی محمد حمتو شنینہ کو رہا کرنے کے بعد مغربی کنارے روانہ کردیا- وزارت برائے امور اسیران کے میڈیا ایڈوائزر ریاض اشقر نے محمد حمتو شنینہ کو غزہ بدر کر کے مغربی کنارے بھیجنے کو بین الاقوامی قوانین کی خلاف ورزی قرار دیا ہے- حمتو شنینہ کو 14 اکتوبر 2006ء کو اغوا کیا گیا تھا- اسرائیلی فوجی عدالت کی جانب سے انہیں ساڑھے تین سال قید کی سزا سنائی گئی- انہوں نے ساڑھے تین سال کا عرصہ صہیونی عقوبت خانوں میں گزارا- رہائی کے بعد انہیں غزہ کی بجائے مغربی کنارے بھیج دیا گیا- ان کا پورا خاندان غزہ میں آباد ہے- وزارت برائے امور اسیران نے انسانی حقوق کی تنظیموں سے مطالبہ کیا کہ وہ اسرائیلی حکومت کی فلسطینیوں کو وطن بدر کرنے کی پالیسی کو رکوانے کے لیے کردار ادا کریں- واضح رہے کہ چند روز قبل اسرائیلی حکومت نے طولکرم کے فلسطینی اسیر کو رہا کرنے کے بعد غزہ روانہ کر دیا تھا-