اسرائیلی فوجی فلسطینی شہریوں کے گھروں میں داخل ہو گئے، تشدد سے ایک فلسطینی زخمی

قابض اسرائیلی فوج کے اہلکار فلسطینی شہریوں کے گھروں میں داخل ہو گئے، اور انہیں تشدد کا نشانہ بنایا- ذرائع کے مطابق الخلیل شہر کے اذنا ٹاون اور العروب کیمپ میں اسرائیلی فوج داخل ہوئی اور علاقے میں کرفیو نافذ کر دیا- اسرائیلی فوجی اہلکار چادر اور چار دیواری کا تقدس پامال کرتے ہوئے متعدد فلسطینی گھروں میں داخل ہو گئے اور تلاشی لی- العروب کیمپ میں اسرائیلی فوجی اہلکار ابوخیر نامی خاندان کے گھر میں داخل ہوئے اور تمام گھروالوں کو کئی گھنٹوں تک ایک کمرے میں بند رکھا- ہفتے میں یہ تیسری دفعہ ہے کہ اسرائیلی فوجی اہلکار ابو خیر خاندان کے گھر میں داخل ہوئے ہیں- ذرائع کے مطابق اسرائیلی فوجی اہلکاروں کے بہیمانہ تشدد سے ایک فلسطینی زخمی ہو گیا جسے ہسپتال منتقل کر دیا گیا ہے- دوسری جانب یہودی آبادکاروں نے الخلیل شہر کے وسط میں الشلالہ روڈ پر واقع فلسطینی شہریوں کے گھروں پر پتھراو کیا-