اسرائیل اپنے آپ کو مظلوم ظاہر کرنے کے لیے مختلف بیانات دے رہا ہے: ڈاکٹر محمود الزہار

اسلامی تحریک مزاحمت (حماس) کے پولٹ بیورو کے رکن ڈاکٹر محمود الزہار نے کہا ہے کہ فلسطینی صدر محمود عباس ( جن کی مدت صدارت ختم ہوچکی ہے) نے بالآخر سیاسی قلع بازیاں لگانا شروع کر دی ہیں- جن کے منفی نتائج برآمد ہوں گے- محمود الزہار نے کہا کہ محمود عباس غیر آئینی صدر ہیں- وہ فلسطینی عوام کے نمائندہ نہیں رہے – ڈاکٹر محمود الزہار نے فلسطینی ریاست کے قیام کے لیے اقوام متحدہ کی طرف رجوع کرنے کے فلسطینی اتھارٹی کے فیصلے پر ردعمل کا اظہار کرتے ہوئے کہا کہ اس اعلان کاکوئی فائدہ نہیں- فلسطینی اتھارٹی کو معلوم ہے کہ امریکا اس قرار داد کو ویٹو کر دے گا – اقوام متحدہ کی طرف رجوع کرنے کا فلسطینی اتھارٹی کا اعلان اس بات کی گواہی ہے کہ 18سال سے جاری مذاکرات اپنی موت آپ مر چکے ہیں- فتح کے مرکزی کمیٹی کے رکن نبیل شعت کی طرف سے دوبارہ مزاحمت کا راستہ اختیار کرنے کے بیان پر تبصرہ کرتے ہوئے ڈاکٹر محمود الزہار نے کہا کہ نبیل شعت کا یہ بیان فلسطینی عوام کی حمایت حاصل کرنے کے لیے ہے- اس طرح کی بات فتح کے رہنما زکی عباس نے بھی کی تھی لیکن جب انہیں تنبیہہ کی گئی تو انہوں نے اپنے بیان سے فوراً توبہ کرلی- محمود الزہار نے مزید کہا کہ اسرائیل اپنے آپ کو مظلوم ظاہر کرنے کے لئے مختلف قسم کے بیانات دے رہا ہے جن میں حماس کے پاس طویل مسافت تک مار کرنے والے میزائل کے متعلق بیان شامل ہے –