مسلم امہ قبلہ اول کے دفاع کے لیے متحد ہوجائے: خطیب مسجد اقصیٰ

مسجد اقصیٰ کے خطیب شیخ اسماعیل نواھضہ نے عالم اسلام سے مطالبہ کیا ہے کہ وہ قبلہ اول کے دفاع اور بیت المقدس شہر کو یہودیوں کی دست برد سے بچانے کے لیے اپنی صفوں میں اتحا د پیدا کریں. اپنے خطبہ جمعہ میں مسجد اقصیٰ کے خطیب کا کہنا تھا کہ دشمن اسلام اور شعائر اسلام کے خلاف اپنی صفوں میں اتحاد پیدا کر رہے ہیں. مسلم امہ کو بھی دشمن کی سازشیں ناکام بنانے کے لیے اپنے اندر اتحاد پیدا کرنا ہو گا. مرکز اطلاعات فلسطین کے مطابق خطبہ جمعة المبارک کے دوران مسجد اقصیٰ کے خطیب نے قبلہ اول اور بیت المقدس کے خلاف جای صہیونی سازشوں پر کڑی تنقید کرتے ہوئے مقدس مقامات کے تحفظ کے سلسلہ میں مسلم امہ کے غفلت پر مبنی کردار پر بھی تنقید کی. انہوں نے کہا کہ دنیا بھر میں پچپن آزاد مسلمان ریاستیں موجود ہیں لیکن وہ قبلہ اول کے لیے کچھ نہیں کر رہیں. یہودی دشمن آئے روز مسجد اقصی پر حملے کرتے اور مقدس شہر القدس کو یہودیت میں تبدیل کرنے کے منصوبے تیار کرتے ہیں. شیخ نواھضہ نے فلسطینی قوم کو مخاطب کرتے ہوئے کہا کہ قبلہ اول کے تحفظ کی سب سے پہلےذمہ داری آپ پر عائد ہوتی ہے. لہذا سب سے پہلے فلسطینیوں کو باہمی اختلافات سے اوپر اٹھ کر مسجد اقصیٰ کے لیے متحد ہونا ہو گا. ان کا کہنا تھا کہ مسجد اقصی اور بیت المقدس تاریخ کے نازک ترین دور سے گذر رہے ہیں. ایسے میں تمام مسلمانوں کی اجتماعی ذمہ داری ہے کہ وہ مسجد اقصی کو بچانے کے لیے اٹھ کھڑے ہوں.شیخ اسماعیل نواھضہ کا کہنا تھا کہ قبلہ اول کا دفاع تنہا فلسطینیوں کے بس کی بات نہیں. مسلمان ممالک کو فلسطینیوں کا ہاتھ بٹانا ہو گا