شام نے اسرائیل کا گولان سے انخلاء کے لیے ریفرنڈم کا اعلان مسترد کر دیا

شام نے اسرائیلی کنیسٹ کے منگل کو منظور کردہ اس بل کو مسترد کر دیا ہے جس میں کہا گیا ہےکہ اسرائیل شام کی گولان پہاڑیوں اور مشرقی بیت المقدس سے انخلاء سے قبل ریفرنڈم کرائے گا. دمشق کا کہنا ہے کہ اسرائیل نے مقبوضہ بیت المقدس اور گولان کی پہاڑیوں پر ناجائز طور پر قبضہ جما رکھا ہے. اسرائیل اپنے قبضے کو جواز فراہم کرنے کے لیے ریفرنڈم کا سہارا لینا چاہتا ہے جو ان مقبوضہ علاقوں سے متعلق عالمی قوانین اور بین الاقوامی ادارے اقوام متحدہ کی قراردادوں کی صریح خلاف ورزی ہے.
مرکز اطلاعات فلسطین کے مطابق منگل کے روز دمشق میں شامی وزارت خارجہ کی طرف سے جاری ایک بیان میں اسرائیلی کنیسٹ کے انخلاء سےمتعلق بل کی منظوری کو مکمل طور پر مسترد کر دیا گیا .
بیان میں واضح کیا گیا ہے کہ مشرقی بیت المقدس اور گولان کی پہاڑیاں عرب علاقے ہیں جن پر اسرائیل نے ناجائز قبضہ کر رکھا ہے. اسرائیل کو ریفرنڈم کے بغیر ہی ان تمام مقبوضہ علاقوں کو خالی کرتے ہوئے خود کو سنہ 1967ء کی جنگ سے پہلے والی پوزیشن پر واپس جانا ہو گا.
واضح رہے کہ لیکوڈ پارٹی کے رکن پارلیمان یاریو لیوین کی جانب سے پیش کردہ اس بل کے مطابق گولان اور القدس کے مقبوضہ علاقوں سے اسرائیلی انخلاء کے کسی بھی فیصلے کے لیے پہلے پارلیمان کے ساٹھ اراکین کی تائید ضروری ہے جس کے بعد عوامی ریفرنڈم کے ذریعے اس کی تائید لینا بھی ضروری ہو گا۔ تاہم اگر پارلیمان کی دو تہائی اکثریت، جو 80 ارکان بنتی ہے، اگر ان علاقوں سے اسرائیلی انخلاء کی منظوری دے دیتی ہے تو عوامی ریفرنڈم کی ضرورت نہیں رہے گی۔