غزہ – (مرکزاطلاعات فلسطین فاؤنڈیشن) گذشتہ شام سے غزہ کی پٹی کے مختلف علاقوں میں قابض اسرائیلی فوج کی فائرنگ اور بمباری کے نتیجے میں چھ شہری شہید ہو گئے جن میں ایک نوجوان بھی شامل ہے جو ناصر میڈیکل کمپلیکس پر بمباری کے زخموں کی تاب نہ لاتے ہوئے دم توڑ گیا جبکہ غزہ کی پٹی کے مختلف علاقوں میں مسلسل فائرنگ اور گولہ باری کے دوران متعدد شہری زخمی بھی ہوئے ہیں۔
وسطی غزہ کی پٹی کے شہر دیر البلح کے مشرق میں القسطل ٹاورز کے اطراف کو نشانہ بنانے والی توپ خانے کی بمباری کے نتیجے میں تین شہری شہید اور 20 سے زائد زخمی ہو گئے۔
قابض اسرائیل کا ایک توپ خانے کا گولہ وسطی غزہ کی پٹی میں دیر البلح شہر کے مشرق میں واقع القسطل ٹاورز کے ٹاور نمبر چھ کے ایک فلیٹ پر آ کر لگا۔
مقامی ذرائع نے اطلاع دی ہے کہ 45 سالہ شہری اکرم سعدی حسنین مشرقی غزہ شہر کے علاقے حي التفاح کے مشرق میں قابض اسرائیلی افواج کی گولی لگنے سے شہید ہو گئے۔
ذرائع کے مطابق قابض اسرائیل کی ملیشیائیں قابض افواج کی آڑ اور شدید فائرنگ کے سائے میں اس علاقے میں دراندازی کر کے داخل ہوئی تھیں۔
گذشتہ رات نصف شب سے کچھ قبل جنوبی غزہ کی پٹی کے شہر خانیونس کے علاقے مواصی میں قابض اسرائیل کے ایک ڈرون طیارے کی بمباری کے نتیجے میں 36 سالہ شہری رمزی نبیل رمضان ابو تیم شہید اور تین دیگر افراد زخمی ہو گئے۔
مزید برآں 20 سالہ شہری محمد ایاد الجزار گذشتہ روز فجر کے وقت خانیونس میں ناصر میڈیکل کمپلیکس کو نشانہ بنانے والی قابض اسرائیل کی بمباری میں لگنے والے زخموں کی تاب نہ لاتے ہوئے شہید ہو گئے۔
اسی تناظر میں مواصی کے علاقے میں قابض افواج کی فائرنگ سے ایک شہری زخمی ہو گیا جبکہ قابض اسرائیل کی فوجی گاڑیوں نے شمال مشرقی خانیونس میں شدید فائرنگ کی اور شہر کے وسطی و مغربی حصوں میں شہریوں کے گھروں کے ساتھ ساتھ مواصی کے علاقے میں بے گھر افراد کے خیموں کی جانب بھی فائرنگ کا سلسلہ جاری رکھا۔
علاوہ ازیں قابض اسرائیل کی جنگی کشتیوں نے جنوبی غزہ کی پٹی میں خانیونس کے کھلے سمندر میں گولے داغے۔
واضح رہے کہ گذشتہ روز غزہ کی پٹی کے مختلف علاقوں پر قابض اسرائیل کے حملوں میں 12 شہری شہید ہوئے تھے جن میں سے چھ شہری خانیونس شہر میں ناصر میڈیکل کمپلیکس کو نشانہ بنانے والے قتل عام میں شہید ہوئے تھے۔
