مذاکرات کی طرف رجوع باراک اوباما کے موقف کی ناکامی ہے: حماس

اسلامی تحریک مزاحمت (حماس) نے مشرق وسطی کے لیے امریکی ایلچی جارج میچل کے دوروں کو بے سود قرار دیا ہے – حماس کے ترجمان فوزی برھوم نے ایک بیان میں کہاہے کہ جارج میچل فلسطینیوں بالخصوص رام اللہ اتھارٹی کو سوائے وعدوں اور خواہشات کے اور کچھ نہیں دیں گے – ان کے تمام مفادات اسرائیل کے لئے ہیں- فوزی برھوم نے کہا کہ امریکا کی طرف سے فلسطینی اتھارٹی کو دوبارہ مذاکرات کی دعوت اسرائیلی جرائم کی پردہ پوشی کرنے کی غرض سے ہے – امریکا کی دعوت کا مطلب اسرائیلی کشتی کو بچانا ہے – فوزی برھوم نے مزید کہا کہ امریکا کواسرائیل پر تمام دباؤ ڈالنا چاہیے- مذاکرات کی طرف رجوع امریکی صدر باراک اوباما کے موقف کی ناکامی اور فلسطینی مذاکرات کار کی ذلت ہے- فوزی برھوم نے واضح کیا کہ مذاکرات فلسطینی عوام کو تقسیم کرنے اور ان تمام کوششوں کو رائیگاں کرنے کے مترادف ہیں جو اسرائیلی رہنماؤں کو عدالت کے کٹہرے میں لانے کے لیے کی جا رہی ہیں-