مغربی کنارہ – (مرکزاطلاعات فلسطین فاؤنڈیشن) لاطینی امریکہ کی فلسطینی فیڈریشن (اوپال) نے ڈائسپورا کے ممالک میں فلسطینی انتخابات کے لیے فالو اپ کمیٹی کی طرف سے انجام دیے جانے والے نام نہاد ”انتخابی عمل“ کو مسترد کرنے کا اعلان کیا ہے۔ فیڈریشن نے یہ مؤقف اختیار کیا ہے کہ منظور شدہ طریقہ کار فلسطینی برادریوں کی حقیقی اور جامع نمائندگی کی ضمانت نہیں دیتا، اور ان کے موقف کے مطابق، یہ اجارہ داری، انفرادیت، اخراج اور فلسطینی قومی فیصلے پر تسلط کے طریقوں کو مزید تقویت دیتا ہے۔
فیڈریشن نے جمعہ کے روز جاری کردہ ایک بیان میں کہا کہ فالو اپ کمیٹی جس نے برازیل کا دورہ کیا، اس کی سرگرمیاں صرف پورتو الیگری اور برازیلیا کے شہروں تک محدود تھیں،ساتھ ہی واضح کیا کہ جو کچھ ہوا وہ ایک ایسا عمل ہے جس کا مقصد ایسے طریقہ کار کے مطابق فلسطینی قومی کونسل تشکیل دینا ہے جو فلسطینی عوام کے اجزاء کی جامع جمہوری نمائندگی کو حاصل نہیں کرتا۔
انہوں نے مزید کہا کہ یہ عمل، ان کے اندازے کے مطابق آٹھ فلسطینی دھڑوں کی طرف سے جامع قومی مفاہمت پر پہنچنے اور جمہوری بنیادوں پر تنظیمِ آزادیِ فلسطین کے اداروں کی از سرِ نو تعمیر سے پہلے انتخابات کے انعقاد کی مخالفت کو نظر انداز کرتے ہوئے سامنے آیا ہے، جو کہ محرومی یا حاشیے پر دھکیلنے سے بالاتر ہو کر فلسطینی عوام کے مختلف اجزاء کی شرکت کو یقینی بنائے۔
لاطینی امریکہ کی فلسطینی فیڈریشن نے اس بات کی تصدیق کی کہ انہوں نے ”کسی بھی شکل میں کسی بھی گفت و شنید میں حصہ نہیں لیا، نہ ہی فلسطینی اتھارٹی یا اس کے نمائندوں کے ساتھ ان انتخابات کے حوالے سے برازیل میں یا کسی اور جگہ کوئی سمجھوتہ طے پایا ہے“، اور اس پورے عمل کو مسترد کرنے پر زور دیا کہ یہ کسی جامع قومی مفاہمت پر مبنی نہیں ہے۔
فیڈریشن نے ایک ایسے جامع قومی راستے کو اپنانے کی دعوت دی جو اعلیٰ قومی مفاد کو ذاتی اور خاندانی حساب کتاب پر مقدم رکھے، اور فلسطینی کاز اور اس کے اداروں کو اقربا پروری، اثر و رسوخ کی تقسیم اور عہدوں اور مراعات سے دور رکھے، تاکہ فلسطینی کوششوں اور توانائیوں کو متحد کرنے اور شراکت، تکثیریت اور جمہوریت کی بنیاد پر سیاسی نظام اور اس کے اداروں کی از سرِ نو تعمیر کی اجازت دی جا سکے۔
بیان میں اس بات پر تنقید کی گئی جسے فلسطینی برادریوں کو حاشیے پر دھکیلنے اور انتخابی عمل سے باہر رکھنے سے تعبیر کیا گیا، اور کہا گیا کہ بعض برادریوں کے افراد کو جامع انتخابات کا انعقاد کیے بغیر، جن میں ڈائےسپورا کے مختلف ممالک کے فلسطینی شامل ہوں، اور برادریوں کو عمل کے مراحل اور اس کے طریقہ کار سے واضح طور پر آگاہ کیے بغیر، نیشنل کونسل کے ارکان کے طور پر نامزد کرنے پر اکتفا کیا گیا۔
فیڈریشن نے برازیل میں فلسطینی صورتحال کا حوالہ دیتے ہوئے کہا کہ وہاں کی فلسطینی برادری ساٹھ ہزار سے زائد فلسطینیوں پر مشتمل ہے، اور یہ سوال کیا کہ آیا اس انتخابی عمل کو برادری کی آواز کی نمائندگی کرنے والا قرار دیا جا سکتا ہے، جب کہ بیان کے مطابق شرکت محدود جغرافیائی دائرہ کار تک محدود تھی اور ملک کے مختلف حصوں میں پھیلے ہوئے فلسطینیوں کو اس میں شامل نہیں کیا گیا تھا۔
فیڈریشن نے سوال کیا: ”تو کیا اتھارٹی کی طرف سے گھڑی گئی ان انتخابی مجالس کو برادریوں کی آواز کی نمائندگی کرنے والا قرار دیا جا سکتا ہے؟“، یہ مانتے ہوئے کہ حقیقی نمائندگی کے لیے فلسطینی برادریوں کو وسیع اور شفاف طریقے سے شامل کرنے اور قومی سطح پر متفقہ جمہوری عمل کے اندر اپنے نمائندوں کا انتخاب کرنے کے ان کے حق کی ضمانت دینے کی ضرورت ہے۔
اپنے بیان کے آخر میں لاطینی امریکہ کی فلسطینی فیڈریشن (اوپال) نے لاطینی امریکہ کے ممالک میں خصوصی طور پر، اور ڈائسپورا کے ممالک میں عموماً انتخابی عمل کو مسترد کرنے کا اعلان کیا، اس بات پر زور دیتے ہوئے کہ ان کے موقف کے مطابق، یہ اپنے تمام اجزاء کے ساتھ فلسطینی عوام کی نمائندگی نہیں کرتا، اور نہ ہی فلسطینی برادریوں کی حقیقی اور جامع نمائندگی کی ضمانت دیتا ہے۔
