اسرائیلی فوج نے نماز تراویح کے دوران مسجد اقصیٰ کے دروازے بند کر دیے

اسرائیلی فوج کی جانب سے فلسطینی شہریوں کو رمضان المبارک میں مسجد اقصیٰ میں عبادات سے روکنے کے لیے مختلف حربوں اور طاقت کے استعمال کا سلسلہ جاری ہے. مرکز اطلاعات فلسطین کے مطابق قابض فوج نے بدھ کی شام مسجد اقصیٰ میں نماز تراویح کے دوران مسجد کے کئی دروازے بند کر دیے جس کے باعث معمراور مریض نمازیوں کو شدید دشواری کا سامنا کرنا پڑا. نمازیوں نے مرکز اطلاعات فلسطین کو بتایا کہ نماز تراویح ابھی جاری تھی کہ مسجد اقصیٰ میں تعینات صہیونی فوجیوں نے باب الاسباط اور باب القطانین بند کر دیے، جبکہ کئی دیگر دروازے بند کرنے کی بھی کوشش کی گئی تاہم موقع پر موجود مسجداقصیٰ کے محافظوں نے انہیں ایسا کرنے سے منع کر دیا. ادھر فلسطینی محکمہ اوقاف کی جانب سے ہدایت کی گئی ہے کہ نمازوں بالخصوص نماز تراویح کے دوران مسجد اقصیٰ کے تمام دروازے کھلے رکھے جائیں تا کہ نمازیوں کو مسجد میں آمد ورفت میں سہولت رہے. ادھر گذشتہ دو روز سے اسرائیلی فوج اور مسجد اقصیٰ کے حفاظتی عملے کے درمیان نماز تراویح کے دوران ہاتھا پائی ہوئی، اسرائیلی فوجی باب القطانین اور باب الاسباط بند کرنے کی کوشش کر رہے تھے جبکہ حفاظتی عملہ انہیں ایسا کرنے سے روک رہا تھا. ادھر دوسری جانب فلسطینی شہریوں کا کہنا ہے کہ اسرائیلی فوج کی نمازتراویح کے دوران مداخلت شہریوں کو اعتکاف سے روکنے کی ایک نئی کوشش ہے. اسرائیل نام نہاد خطرات کی آڑ میں رمضان المبارک کے آخری عشرے میں روزہ داروں کے اعتکاف کی راہ روک رہا ہے.