حماس کی آج جمعہ کے روز فلسطین کے حق میں یومِ حمایت اور وفاداری منانے کی اپیل

مقبوضہ بیت المقدس – (مرکزاطلاعات فلسطین فاؤنڈیشن) حماس نے جمعرات کے روز فلسطینی عوام، عرب و اسلامی اقوام اور دنیا بھر کے آزاد انسانوں سے اپیل کی ہے کہ وہ جمعہ کے دن کو فلسطینی کاز، بالخصوص القدس، غزہ کی پٹی، مغربی کنارے اور فلسطینی قیدیوں کے ساتھ حمایت،غصے اور وفاداری کے اظہار کے دن کے طور پر منائیں۔

ایک پریس بیان میں حماس نے فلسطینیوں اور ان کے حامیوں پر زور دیا کہ وہ دنیا بھر کے ممالک، دارالحکومتوں اور عوامی مقامات پر اپنی آواز بلند کریں اور اس عزم کی تجدید کریں کہ مسجد اقصیٰ فلسطین اور امت مسلمہ کے دل میں ہمیشہ مرکزی حیثیت رکھے گی اور اس کی اسلامی شناخت کو نہ مٹایا جا سکتا ہے اور نہ ختم کیا جا سکتا ہے۔

یہ اپیل مسجد اقصیٰ کو نذرِ آتش کیے جانے کے 57ویں سال کے موقع پر سامنے آئی ہے، جو جمعہ 21 اگست 2026ء کو منایا جا رہا ہے۔ 21 اگست 1969ء کی صبح ایک انتہا پسند آسٹریلوی عیسائی شہری ڈینس مائیکل روہن نے مسجد اقصیٰ کے قبلی مصلیٰ کے مشرقی حصے میں دانستہ آگ لگا دی تھی۔

حماس نے کہا کہ مسجد اقصیٰ کو آگ لگانے کا واقعہ ’’مسجد کے خلاف جاری اور مسلسل بڑھتی ہوئی مہم کی ایک کڑی‘‘ تھا۔ تحریک نے اسے مسجد اقصیٰ کو یہودیانے اور اس پر کنٹرول اور تقسیم مسلط کرنے کی اسرائیلی جنگ کا حصہ قرار دیا۔

تحریک نے زور دیا کہ فلسطینیوں کی ثابت قدمی اور اپنے حقوق و مقدس مقامات سے وابستگی کے سامنے یہ کوششیں اپنے مقاصد حاصل نہیں کر سکیں گی۔ حماس نے کہا کہ اسرائیلی ’’جارحیت اور جرائم‘‘ وقت گزرنے کے باوجود اسے کسی قسم کا جواز یا قانونی حیثیت فراہم نہیں کر سکتے۔

حماس نے مسجد اقصیٰ میں موجودہ پیش رفت اور اسے مسمار کرنے اور یہودیانے کے منصوبوں کے خطرے سے خبردار کرتے ہوئے مطالبہ کیا کہ مسجد اقصیٰ کو آگ لگائے جانے کی برسی کو القدس اور اس کے عوام کی حمایت کے ایک نئے مرحلے میں تبدیل کیا جائے۔

تحریک نے مسجد اقصیٰ میں اسرائیلی دراندازیوں، یہودی بستیوں کی توسیع، فلسطینیوں کی بے دخلی کے احکامات اور ان کے ساتھ روا رکھے جانے والے مظالم کے خلاف آواز بلند کرنے اور مسجد اقصیٰ پر زمانی و مکانی تقسیم مسلط کرنے کی تمام کوششوں کو مسترد کرنے کی بھی اپیل کی۔

حماس نے مسجد اقصیٰ، شہید ہونے والے فلسطینیوں کے خون، قیدیوں کی قربانیوں اور القدس، غزہ اور مغربی کنارے میں فلسطینیوں کی ثابت قدمی سے اپنی وفاداری کا اعادہ کرتے ہوئے ان قربانیوں سے وفادار رہنے کے عزم کا اظہار کیا۔

حماس نے اپنے بیان کے اختتام پر مزاحمت جاری رکھنے کے عزم کا اظہار کرتے ہوئے کہا کہ وہ اس وقت تک ’’تھکے گی نہ پیچھے ہٹے گی‘‘ جب تک فلسطینی عوام اپنی آزادی حاصل نہیں کر لیتے اور ان کی سرزمین اور مقدس مقامات ’’قبضے سے پاک‘‘ نہیں ہو جاتے۔