مغربی کنارہ (مرکزاطلاعات فلسطین فاؤنڈیشن) یہودی آبادکاروں نے قابض اسرائیلی فوج کی سرپرستی میں نابلس کے جنوب میں واقع قصبے قصرہ کے تین مکانات کا مسلسل 12ویں روز بھی محاصرہ جاری رکھا ہوا ہے۔ ذرائع کے مطابق اس اقدام کا مقصد فلسطینی خاندانوں کو ان کے گھروں سے بے دخل کرکے املاک پر قبضہ کرنا اور علاقے میں نئی زمینی حقیقت مسلط کرنا ہے۔
قصرہ میونسپل کونسل کے سربراہ عبدال عظیم وادی نے بتایا کہ قابض اسرائیلی فوج اور متعدد آبادکار قصبے کے علاقے راس العین میں واقع تین مکانات کو گھیرے ہوئے ہیں اور وہاں رہنے والے خاندانوں کو گھروں میں داخل ہونے یا باہر نکلنے سے روکا جا رہا ہے۔ ان میں سے ایک مکان پر قبضہ کرکے اسے فوجی چوکی میں تبدیل کر دیا گیا ہے جبکہ اردگرد کے علاقے کو بند فوجی زون قرار دے دیا گیا ہے۔
محصور خاندان خوراک اور ادویات کی قلت کا شکار
عبدالعظیم وادی کے مطابق طویل محاصرے کے باعث محصور خاندانوں کو شدید انسانی مشکلات کا سامنا ہے۔ قابض فوج ضروری اشیائے خورونوش اور بعض ادویات گھروں تک پہنچنے نہیں دے رہی، جس کے باعث خاندان خوراک اور طبی ضروریات کی قلت کا شکار ہیں۔
یہ محاصرہ مقبوضہ مغربی کنارے کے مختلف علاقوں میں آبادکاروں کے مسلسل حملوں کے دوران کیا جا رہا ہے، جہاں فلسطینیوں کو اپنے گھروں اور اراضی سے بے دخل کرنے کے لیے دباؤ بڑھایا جا رہا ہے۔
وادی اردن میں خربہ سمرہ پر مسلسل دھاوے
شمالی وادی اردن میں یہودی آبادکاروں نے جمعرات کے روز خربہ سمرہ پر ایک بار پھر دھاوا بولا اور فلسطینی رہائشیوں کے خیموں کے درمیان گھومتے رہے۔ مقامی ذرائع کے مطابق علاقے میں اس نوعیت کے واقعات تقریباً روزانہ پیش آ رہے ہیں۔
خربہ سمرہ اور شمالی وادی اردن کی دیگر فلسطینی بستیوں کو مسلسل آبادکار حملوں کا سامنا ہے، جن میں رہائشی علاقوں میں دھاوے، چرواہوں کو ہراساں کرنا اور چراگاہوں پر قبضے کی کوششیں شامل ہیں۔
مقامی ذرائع کا کہنا ہے کہ یہ حملے فلسطینی آبادی کو ان کی زمینوں سے بے دخل کرنے کی منظم کوششوں کا حصہ ہیں، جن کے ذریعے روزمرہ زندگی محدود، روزگار کے ذرائع متاثر اور علاقے میں نئی زمینی صورت حال مسلط کرنے کی کوشش کی جا رہی ہے۔
15 سالہ لڑکی اور 70 سالہ خاتون زخمی
دریں اثنا، بدھ کی شام قصرہ میں ایک گھر پر قابض اسرائیلی فوج کے دھاوے کے دوران اصلی گولیوں کے ٹکڑے لگنے سے 15 سالہ لڑکی اور 70 سالہ خاتون زخمی ہو گئیں۔
فلسطینی ہلال احمر کے مطابق اس کی طبی ٹیموں نے دونوں زخمیوں کو جسم کے ایک حصے میں چھروں کے زخموں کے باعث طبی امداد فراہم کی۔ مقامی ذرائع نے بتایا کہ قابض فوج نے گھر کے اندر فائرنگ کی، جس کے نتیجے میں خاندان کی دونوں خواتین زخمی ہوئیں۔
قابض اسرائیلی فوج اور آبادکاروں کی جانب سے مغربی کنارے کے مختلف علاقوں میں فلسطینیوں کے خلاف حملے، گھروں پر دھاوے اور پابندیاں بدستور جاری ہیں۔
دیوار و آبادکاری مزاحمت کمیشن کے اعداد و شمار کے مطابق صرف جولائی کے دوران قابض اسرائیلی فوج اور آبادکاروں نے فلسطینیوں کے خلاف 2,256 حملے کیے، جن میں 1,458 حملے اسرائیلی فوج سے منسوب کیے گئے ہیں۔
