غزہ – (مرکزاطلاعات فلسطین فاؤنڈیشن) قابض اسرائیلی فوج نے آج ہفتے کے روز غزہ کی پٹی میں جنگ بندی معاہدے کی خلاف ورزیوں میں شدت پیدا کر دی ہے۔ جنگ بندی کے 274 ویں روز صہیونی فوج کی طرف سے غزہ میں مکانات کی تباہی کا سلسلہ تیزکردیا گیا ہے۔ قابض فوج نے خان یونس اور غزہ شہر کے مشرقی علاقوں میں دھماکہ خیز کارروائیاں اور شدید فائرنگ کا سلسلہ شروع کر دیا ہے۔
ہمارے نامہ نگار نے اطلاع دی ہے کہ قابض افواج نے خان یونس شہر کے مشرقی علاقوں میں یکے بعد دیگرے چار دھماکہ خیز کارروائیاں کیں، جس کے ساتھ ہی اسرائیلی ٹینکوں کی جانب سے علاقے میں شدید گولہ باری بھی کی گئی۔
علاوہ ازیں، ایک ’کواڈ کاپٹر‘ ڈرون نے خان یونس کے مشرق میں واقع ’بنی سہیلہ‘ چوک کے شمال میں بم گرائے، جبکہ اسرائیلی ٹینکوں نے خان یونس اور غزہ شہر کے مشرقی علاقوں کو اپنی فائرنگ کا ہدف بنایا۔
نامہ نگار نے مزید بتایا کہ قابض فوج کی گاڑیوں نے غزہ شہر کے مشرق میں واقع ’حی التفاح‘ کے علاقے میں ’ہاشمیہ اسکول‘ اور ’منتزہ المحطہ‘ کے ارد گرد شدید فائرنگ کی، جبکہ ’کواڈ کاپٹر‘ ڈرون طیاروں نے ’حی الشجاعیہ‘ اور ’حی التفاح‘ کے علاقوں میں شاہراہِ صلاح الدین کے قریب شہریوں کے گھروں کو نشانہ بنایا۔
اس کے ساتھ ہی غزہ کی پٹی کے کئی علاقوں میں ڈرون طیاروں کی پروازیں بھی جاری ہیں، جو قابض فوج کی مسلسل عسکری کارروائیوں کا حصہ ہیں۔
قابض اسرائیلی فوج گزشتہ سال 10 اکتوبر کو نافذ ہونے والے جنگ بندی معاہدے کی مسلسل خلاف ورزی کر رہی ہے۔
غزہ میں فلسطینی وزارتِ صحت کا کہنا ہے کہ بہت سے شہداء اب بھی ملبے تلے دبے ہوئے ہیں اور سڑکوں پر پڑے ہیں، کیونکہ ایمبولینس اور سول ڈیفنس کا عملہ ان تک پہنچنے سے قاصر ہے۔
وزارت کے تازہ ترین اعداد و شمار کے مطابق، 11 اکتوبر کو جنگ بندی کے بعد سے اب تک شہداء کی تعداد 1,092، زخمیوں کی تعداد 3,507 اور ملبے سے نکالے گئے اجساد کی تعداد 799 ہو چکی ہے۔
7 اکتوبر 2023ء سے شروع ہونے والی جارحیت کے بعد سے اب تک شہداء کی مجموعی تعداد 73,118 اور زخمیوں کی تعداد 173,615 تک پہنچ گئی ہے۔
