غزہ – (مرکزاطلاعات فلسطین فاؤنڈیشن) قابض اسرائیلی فوج نے غزہ کی پٹی میں اپنے فوجی جارحیت میں شدت پیدا کر دی ہے، جو مسلسل 261 ویں دن بھی جاری ہے۔ مختلف علاقوں کو توپ خانے سے نشانہ بنایا جا رہا ہے اور شدید فائرنگ کے ساتھ ساتھ اسرائیلی فوجی گاڑیوں کی محدود پیش قدمی بھی جاری ہے۔
خانیونس شہر کے مغرب میں ایک بچہ اپنے زخموں کی تاب نہ لاتے ہوئے شہید ہو گیا۔ ہمارے نامہ نگار کے مطابق، 10 سالہ ولید یوسف ابو جزر گزشتہ منگل کو خانیونس کے مغرب میں اسرائیلی بمباری میں زخمی ہوئے تھے، جو آج چل بسے۔
دریں اثناء قابض فوج کی توپ خانے اور گاڑیوں نے غزہ کی پٹی کے وسطی علاقے میں واقع المغازی کیمپ کے مشرقی حصوں پر فائرنگ کی۔ اس دوران قابض فوج کی گاڑیوں اور پیادہ دستوں نے کیمپ کے جنوب مشرق میں شہری سلیم المصدر کے گھر کا محاصرہ کر لیا اور شدید فائرنگ کی۔
غزہ کی پٹی کے جنوب میں، قابض فوج کے توپ خانے نے خانیونس شہر کے جنوبی علاقوں کو نشانہ بنایا، جبکہ اسرائیلی ٹینکوں نے شہر کے مشرق میں شدید فائرنگ کی اور ساؤنڈ بم برسائے، یہ سلسلہ وقفے وقفے سے جاری ہے۔
شمالی غزہ میں، ہمارے نامہ نگار نے جبالیہ کیمپ کے وسط میں “الترنس” کے علاقے میں اسرائیلی فوجی گاڑیوں کی محدود پیش قدمی کی اطلاع دی ہے، جس کے ساتھ ساتھ وہاں فائرنگ کا سلسلہ بھی جاری ہے۔
گزشتہ روز جمعہ کی شام، غزہ کی پٹی کے وسط میں قابض طیاروں نے پولیس کی گاڑی کو نشانہ بنایا، جس کے نتیجے میں تین افسران اور اہلکار شہید ہو گئے۔ اس کے علاوہ شمالی غزہ میں ایک اسرائیلی ڈرون حملے میں ایک شہری شہید ہوا۔
وزارتِ داخلہ اور نیشنل سکیورٹی نے جن شہداء کی تصدیق کی ہے ان میں کیپٹن منصور سامی شحتوت، کیپٹن محمد خالد نوفل اور سارجنٹ مہدی نادر جبر شامل ہیں۔ وزارت نے سول پولیس کے اہلکاروں کو نشانہ بنانے کے اس گھناؤنے فعل کی شدید مذمت کی ہے، جسے انہوں نے غزہ میں افراتفری پھیلانے کی دانستہ کوشش قرار دیا ہے۔
تازہ ترین اعدادوشمار کے مطابق، 10 اکتوبر کو جنگ بندی کے اعلان کے بعد سے اب تک 1031 شہداء اور 3309 زخمی ہو چکے ہیں، جبکہ 785 لاشیں بھی نکالی گئی ہیں۔ 7 اکتوبر 2023 سے شروع ہونے والی مجموعی جارحیت کے نتیجے میں شہداء کی تعداد 73,043 اور زخمیوں کی تعداد 173,417 تک پہنچ گئی ہے۔
