یورپی امدادی قافلہ” شہ رگ زندگی 3” شام سے مصر کیلئے بحری سفر پرروانہ

غزہ کیلئے یورپی امدادی قافلہ شام سے مصرکیلئے بحری سفر پر روانہ ہو گیا جہاں سے وہ اپنی منزل غزہ کی طرف رخ کرے گا۔ شام میں مقیم فلسطینی پناہ گزینوں نے قافلے کو لاذقیہ کی بندرگاہ پر بڑے پرجوش انداز میں الوداع کیا۔ شام میں قافلے کی سرکاری اور غیر سرکاری سطح پر بہت حوصلہ افزائی کی گئی اور اس کے اعزاز میں مختلف تقریبات کا انعقاد کیا گیا۔ قافلے کے رکن زاہد بیراوی نے واضح کیا کہ فیصلہ کیا گیا ہے کہ قافلے کاامدادی سامان ترکی کے بحری بیڑے کے ذریعے مصری بندرگاہ عریش پہنچایا جائے گا جبکہ قافلے کے ارکان ہوائی جہاز کے ذریعے مصر پہنچیں گے۔ واضح رہے کہ غز ہ کے لئے یورپی امدادی قافلہ برطانیہ کے دارالحکومت لندن سے روانہ ہوا تھا۔ دس ممالک کے دارالحکومت سے ہوتا ہو چند روز قبل شام پہنچا تھا۔ قافلے میں سترہ یورپی اور عرب ممالک کے 500کارکن موجود ہیں ۔امدادی قافلے کے سربراہ برطانوی رکن پارلیمنٹ جارج گیلوے ہیں۔ اس قافلے کو شہ رگ زندگی 3کا نام دیا گیا ہے۔قبل ازیں بھی جارج گیلوے کی سربراہی میں دو فافلے بالترتیب شہ رگ زندگی1 شہ رگ زندگی 2 غزہ پہنچے تھے۔