کرپشن کے مرتکب دو فلسطینی وزراء کو برطرفی کا سامنا

رام اللہ میں سلام فیاض کی غیر آئینی حکومتی کابینہ میں شامل دو وزراء کو اخلاقی اور مالی کرپشن کے الزامات کی وجہ سے ان کے منصب سے ہٹایا جا رہا ہے۔

وزیر اعظم سلام فیاض کے مقرب حلقوں نے مرکز اطلاعات فلسطین کو بتایا کہ وزیر صحت علی الخشان کو اخلاقی گراوٹ کے متعدد الزامات کا سامنا ہے۔ یہ الزامات ان پر گذشتہ دنوں دورہ فرانس کے موقع پر لگائے گئے۔

فرانس میں فلسطینی قونصل خانے کو وزیر موصوف کے خلاف اخلاقی دیوالیہ پن کے متعدد الزامات کی فہرست بھجوائی گئی جو ان کی دست درازیوں کا شکار ہونے والی متعدد خواتین نے متعلقہ حکام کو شکایات کی صورت درج کرائے تھے۔

بدعنوانی کی وجہ سے کابینہ سے نکالے جانے والے دوسرے وزیر اسماعیل دعیق ہیں۔ ان کے پاس وزارت زراعت کا قلمدان ہے اور ایک مدت سے ان کے خلاف مالی بدعنوانی کی شکایات پیش کی جا رہی ہیں۔ گذشتہ پیر کے روز اٹارنی جنرل نے ان کے خلاف ایک مقدمے کی سماعت کرنا تھی لیکن وزیر موصوف عین وقت پر غائب ہو گئے۔

ذرائع کا کہنا ہے کہ دونوں وزیر کو جلد ہی ان کے عہدوں سے ہٹا دیا جائے گا۔ نیز مالی اور انتظامی بدعنوانی کے الزمات کا سامنہ کرنے والے دوسرے وزراء کو بھی ایسے ہی انجام دسے دوچار ہونا پڑے گا۔