پولینڈ فلسطینی رہنما کے قتل میں ملوث موسادی ایجنٹ کو جرمنی کے سپرد کریگا

پولینڈ کی مقامی عدالت نے فلسطینی رہنما محمود مبحوح کے قتل میں ملوث موساد کے ایجنٹ کو جرمنی کے سپرد کرنے کا حکم سنا دیا۔ پولینڈ کے شہر وارسا سے پچھلے ماہ پکڑے گئے اوری برودسکی پر قتل کی کارروائی کے لیے جرمنی کا جعلی پاسپورٹ بنوانے کا الزام ہے جس پر برلن حکام نے اس کی جرمن حوالگی کا مطالبہ کر رکھا تھا۔ واضح رہے کہ رواں سال کے آغاز میں فلسطین کے مقبول رہنما محمود مبحوح کو دبئی میں ایک ہوٹل کے کمرے میں شہید کر دیا گیا تھا، کارروائی میں حصہ لینے کے لیے موساد کے ایجنٹ دنیا کے متعدد ممالک سے جعلی پاسپورٹ بنوا کر دبئی پہنچے تھے۔ مبینہ طور پر قاتلوں کو جرمنی کا جعلی پاسپورٹ بنوا کر دینے والے برودسکی کے بارے میں پولینڈ کے شہروارسو کی مقامی عدالت کے جج نے کہا کہ عدالت نے ملزم کو سزا دینے کے لیے جرمنی کے سپرد کرنے کا فیصلہ کیا ہے، فاضل جج نے کہا کہ عدالت نے ملزم کے جرم کی تفتیش نہیں کی بلکہ جرمنی حوالگی کی درخواست کے درستگی اور مطلوبہ شخص کی شناخت کی تصحیح کر کے یہ فیصلہ سنایا ہے۔ اصل جرم کا مقدمہ اب جرمنی کی عدالت میں چلے گا۔ قبل ازیں موسادی ایجنٹ کو پولینڈ پولیس کے اسپیشل یونٹ کے مسلح نقاب پوش سات اہلکاروں کی کڑی حفاظت میں عدالت میں پیش کیا گیا۔ واضح رہے کہ ملزم کو سات دن تک فیصلے کے خلاف نظرثانی کی درخواست دینے کا حق ہے۔ اسے گزشتہ ماہ کی چار تاریخ کو وارسا کے ائیر پورٹ سے جرمنی کے جاری کردہ یورپی وارنٹ گرفتاری کی بنا پر گرفتار کیا گیا تھا۔ مبحوح کے قاتلوں کے لیے جرمنی کا جعلی پاسپورٹ بنوانے کے علاوہ پولینڈ کے اخبار’’گزیٹا ویبرچا‘‘ کی جانب سے برودسکی پر جاسوسی کا الزام بھی لگایا گیا ہے۔