اسرائیلی فوج میں خودکشی کی شرح میں ریکارڈ اضافہ

اسرائیلی فوجیوں میں خودکشی کے رجحان میں اضافے نے فوج کی ہائی کمان سمیت حکومتی حلقوں کو تشویش میں مبتلا کر دیا ہے۔ مرکز اطلاعات فلسطین نے کثیر الاشاعت عبرانی روزنامے “یدیعوت احرونوت” کے حوالے سے ایک رپورٹ میں انکشاف کیا ہے کہ غزہ جنگ کے بعد اسرائیلی فوجیوں کی خود کشی کے واقعات میں ریکارڈ شرح سے اضافہ دیکھنے میں آیا ہے۔ رپورٹ میں فوجی ذرائع کے حوالے سے بتایا گیا ہے کہ فوج میں خودکشی کے بڑھتے ہوئے رحجان نےحکومت اور فوج کی ہائی کمان کو تشویش میں مبتلا کردیا ہے۔ اتنی بڑی تعداد میں حاضر سروس فوجیوں کا خود کو ہلاک کرنا اس شعبے کی کارکردگی پر بھی ایک سوالیہ نشان ہے۔ رپورٹ کےمطابق گذشہ چھ ماہ کے دوران 19 صہیونی فوجیوں نے خودکشی کا ارتکاب کیا جبکہ گزشتہ برس خود کشی کرنے والے والوں فوجیوں کی تعداد 21 تھی۔ سنہ 2005ء کے دوران مجموعی طور پر 35 فوجیوں نے خودکشی کی۔ اسرائیلی فوجیوں میں خود کو ہلاک کرنے کی شرح میں 100 فی صد اضافہ ریکارڈ کیا گیا ہے۔ فوج میں خود کشی کےبڑھتے ہوئے واقعات کا محرک جاننے کے لیے ماہرین نفسیات کو بھی فوج میں بھیجا گیا تھا۔ یاد رہے کہ طبی ماہرین بھی اسرائیلی فوج میں خود کشی کے بڑھتے ہوئے رحجان کا سبب جاننے میں ناکام چلے آ رہے ہیں۔