وکی لیکس امریکا اسرائیل خفیہ تعلقات منظرعام پر لانے کے لیے پرعزم

اسرائیلی ذرائع ابلاغ کے مطابق اسرائیل میں امریکی سفارت خانے نے اسرائیلی وزارت خارجہ کو بتایا ہے کہ ویب سائٹ ’’وکی لیکس‘‘ نے واشنگٹن اور تل ابیب کے خفیہ تعلقات کے متعلق چار لاکھ دستاویز منظر عام پر لانے کا اعلان کیا ہے جس سے دونوں ملکوں کے لیے مشکلات پیدا کرنے کا سبب بنے گا۔ اسرائیلی سفارت خانے کے ایک عہدے دار نے نام نہ بتانے کی شرط پر بتایا کہ اسرائیل میں امریکی سفارت خانے کی جانب سے سفارتی مواد اور رپورٹوں پر مشتمل بہت سی دستاویز واشنگٹن بھیجی گئی ہیں جنہیں منظر عام پر لایا جا سکتا ہے۔ انہوں نے کہا کہ ان دستاویز کی اشاعت سے دونوں ملکوں کو شدید مسائل کا سامنا کرنا پڑ سکتا ہے جس کے لیے اسرائیل کو تیار رہنا چاہیے۔ امریکی سفارت خانے کے ترجمان کرٹ ھبر نے اسرائیل کے ایوان وزیراعظم کو یہ پیغام بھیجنے کی تردید نہیں کہ ’’وکی لیکس‘‘ پر دستاویز کی اشاعت سے شدید نقصان ہو گا۔ واضح رہے کہ امریکی اخبار ’’نیویارک ٹائمز‘‘ برطانوی اخبار ’’گارڈین‘‘ اور جرمن اخبار ’’ڈیر شیگل‘‘ نے شائع کی جانے والی دستاویز کا کچھ حصہ بطور تمہید شائع کر دیا ہے۔