مذہبی اور انسانی حقوق کی تنظیمیں عالمی ضمیر بیدار کریں: فلسطینی فورم ہالینڈ

ہالینڈ میں مقیم فلسطینیوں نے مسجد اقصیٰ کے قریب یہودی معبد کے افتتاح کی مذمت کی ہے۔

ہالینڈ میں فلسطینی فورم کے رکن ابراہیم حسن نے بیان میں مسجد اقصیٰ کے قریب یہودی معبد کی تعمیر مسجد کو شہید کرنے کا پہلا قدم قرار دیا ہے۔ انہوں نے ایک بیان میں کہا کہ اب معاملہ مسجد اقصیٰ کے قریب یہودی معبد کی تعمیر تک پہنچ چکا ہے۔ اسرائیلی حکومت کی سرپرستی میں انتہا پسند یہودیوں کا یہ اقدام انسانی اقدار اور بین الاقوامی معاہدوں کی خلاف ورزی ہے۔ عالمی انسانی ضمیر سو چکا ہے۔

انہوں نے کہا کہ مذہبی اور انسانی تنظیموں کو چاہیے کہ وہ عالمی ضمیر کو بیدار کریں۔ اسلامی اور عیسائی مقدسات کا دفاع آزاد دنیا کا فرض ہے۔

ابراہیم حسن نے کہا کہ مسجد اقصیٰ کے قریب یہودی معبد کے افتتاح سے ڈیڑھ ارب مسلمانوں کے دینی جذبات مجروح ہوئے ہیں۔ یہ مسلمانوں کے لیے ایک المناک حادثہ ہے۔

ابراہیم حسن نے یورپی ممالک بالخصوص ہالینڈ کی حکومت سے مطالبہ کیا کہ وہ مقدسات کے خلاف ننگی جارحیت کو روکنے کے لیے اسرائیل پر دباؤ ڈالیں۔ صہیونی اقدام اس بین الاقوامی قانون کی خلاف ورزی ہے جس پر یورپی ممالک نے دستخط کیے ہیں۔