محمودالمبحوح کے مشتبہ قاتلوں کی تعداد 17ہو گئی

دبئی پولیس نے اسلامی تحریک مزاحمت (حماس) کے کمانڈر محمو دالمبحوح کے مشتبہ قاتلوں کی لسٹ طویل ہونے کا عندیہ دیا ہے۔ دبئی پولیس انسپکٹر ضاحی خلفان نے کہاہے محمود المبحوح کے قتل میں ملزموں کی تعداد 17ہو سکتی ہے ۔ انہوں نے دبئی پولیس کو مطلوب افراد میں کسی فلسطینی کے ہونے کو مسترد کر دیا۔ ضاحی خلفان نے اخباری بیان میں کہاکہ دبئی پولیس کو مطلوب افراد میں کوئی فلسطینی شامل نہیں ہے ۔ مطلوب افراد میں کچھ مزید افراد کو شامل کیا جارہا ہے جو یورپی پاسپورٹ کے حامل ہیں ۔ واضح رہے کہ برطانوی ذرائع ابلاغ نے خبرد ی تھی کہ پولیس کو محمود المبحوح کے قتل کے الزام میں کچھ فلسطینی افراد بھی مطلوب ہیں۔