شمالی غزہ میں اسرائیلی فوج کی فائرنگ سے فلسطینی بزرگ شہید

شمالی غزہ کے علاقے بیت حانون میں اسرائیلی فوج کی فائرنگ سے عمر رسیدہ فلسطینی شہری شہید ہو گیا۔ 65 سالہ شاکر قرموط اپنے روز مرہ کے کام میں مصروف تھا کہ صہیونی فوج نے ان پر فائر کھول دیا، سینے پر تین گولیاں لگنے کے سبب بزرگ موقع پر ہی جاں بحق ہو گئے۔ فلسطینی میڈیکل سروسز کے میڈیا کوآرڈینیٹر ادھم ابوسلمیہ نے ’’مرکز اطلاعات فلسطین‘‘ کو دیے گئے اپنے خصوصی بیان میں بتایا کہ قرموط ایک کسان تھے، وہ اپنے کھیتوں میں کام کر رہے تھے کہ فوجی اہلکاروں کی اندھا دھند فائرنگ کی زد میں آ کر موقع پر ہی جاں بحق ہو گئے، ان کے جسد خاکی کو بیت حانون کے عودہ ہسپتال منتقل کر دیا گیا ہے۔ واضح رہے کہ غزہ کی مشرقی سرحد پر کام کرنے والے فلسطینی مزدور اور کسان آئے روز اسرائیلی فوج کی دہشت گردی کا شکار ہوتے رہتے ہیں۔