شمالی غزہ میں اسرائیلی فائرنگ سے دو فلسطینی زخمی

اسرائیلی سکیورٹی فورسز نے شمالی غزہ کے مشرقی سرحدی علاقے میں کام کرنے والے دو فلسطینی مزدوروں کو فائرنگ کر کے زخمی کر دیا ہے۔ مزدور بیت لاھیا کے علاقے میں عمارتوں کا ملبہ اٹھا رہے تھے کہ صہیونی فائرنگ کا نشانہ بن گئے۔ فلسطینی میڈیکل سروسز کے میڈیا کوآرڈینیٹر ادھم ابو سلمیہ کے مطابق 24 اور 29 سال کے دو فلسطینی غزہ کے سرحد پر عمارتوں کا ملبہ اٹھا رہے تھے کہ سرحد پار کھڑی صہیونی فوج نے ان کی ٹانگوں پر فائرنگ کر دی جس سے دونوں زخمی ہو گئے، دونوں کو ہسپتال منتقل کر دیا گیا ہے۔ خیال رہے کہ اسرائیل نے پانچ سال سے غزہ کی ناکہ بندی کر رکھی ہے اور جنوری 2009ء کی جنگ میں غزہ کی تباہ ہونے والی عمارتیں تاحال تعمیر نہیں ہو سکیں۔ اسرائیلی فوج سرحدی علاقوں میں ان عمارتوں کا ملبہ اٹھانے کی کوشش کرنے والے فلسطینیوں پر فائرنگ کرتا رہتا ہے اور تاحال سیکڑوں فلسطینی غزہ کی اسرائیلی سرحد پر زخمی ہو چکے ہیں۔ مزید برآں اسرائیل غزہ کی حدود میں داخل ہو کر بھی جارحیتوں کا ارتکاب کرتا رہتا ہے۔ غزہ پر فضائی بمباری اور مغربی ساحل پر ماہی گیروں پر فائرنگ بھی آئے روز کا معمول ہے۔