دو روزہ بندش کے بعد رفح کراسنگ دوبارہ کھول دی گئی

مصری حکام نے دو روز کی بندش کے بعد غزہ اور مصر کے سرحد پر واقع رفح کراسنگ کو دوبارہ کھولنے کا فیصلہ کیا ہے۔ بچیس کلومیٹر طویل سرحد پر موجود اس واحد راہداری کو کھولنے کا فیصلہ ہفتہ وار اجازت پر عمل کرتے ہوئے کیا گیا ہے۔ رفح کراسنگ کے ڈائریکٹر ایوب ابو شعر نے ذرائع ابلاغ کو بتایا کہ اتوار کے روز کراسنگ کھولنے کے فورا بعد چار بسیں راہداری سے گزر کر مصر گئی ہیں جن میں سے ہر ایک پر 40 سے 50 افراد سوار تھے۔ انہوں نے واضح کیا کہ سفر کی رجسٹریشن جاری ہے اور ہر روز 300 مسافروں کو راہداری سے گزرنے کی اجازت کا فیصلہ کیا گیا ہے۔ انہوں نے کہا کہ کراسنگ سے گزرنے والوں کی تعداد کو بڑھانے کی کوشش بھی کی گئی تھی تاہم مصری حکام نے ملکی حالات کے پیش نظر اس سے معذرت کرلی ہے۔ ابو شعر نے بتایا کہ جمعرات کے روز سے تاحال 900 مسافر مصر داخل ہوچکے ہیں جبکہ 2000 سے زائد لوگ مصر سے غزہ آئے ہیں۔