حوارہ جیل میں فلسطینی قیدیوں نے بھوک ہڑتال کا اعلان کر دیا

مغربی کنارے کے ضلع نابلس میں حوارہ جیل کے فلسطینی قیدیوں نے رمضان کے بابرکت مہینے میں جیل انتظامیہ کی جانب سے انتہائی ناقص خوراک کی فراہمی پر بھوک ہڑتال کا اعلان کر دیا، قیدیوں کے مطابق ماہ مقدس میں کھانے کی مقدار کم کرنے کے ساتھ ساتھ اس کا معیار بھی انتہائی ناقص کر دیا گیا ہے، قیدیوں کے لیے تیار کیا جانے والا کھانا کسی صورت کھانے کے قابل نہیں۔ فلسطینی قیدیوں کی کمیٹی نے ذرائع ابلاغ کو دیے گئے اپنے بیان میں کہا ہے کہ کمیٹی کے وکلا کو جیل میں موجود قیدیوں سے ملنے سے روکا جا رہا ہے تاکہ قیدیوں کی حالت زار سے آگاہی نہ ہو سکے، تاہم جیل سے رہائی پانے والے ایک قیدی نے انکشاف کیا ہے کہ جیل میں موجود قیدیوں کی حالت انتہائی ناگفتہ بہ ہے اور ان کے ساتھ انتہائی غیر انسانی سلوک کیا جا رہا ہے۔ حوارہ کے عقوبت خانے سے رہائی پانے والے قیدی کے مطابق ماہ مقدس کے شروع ہوتے ہی جیل انتظامیہ نے قیدیوں کا کھانا انتہائی ناقص کر دیا ہے جو بالکل بھی کھانے کے قابل نہیں، بالخصوص رمضان کے آغاز سے ہی قیدیوں کی تکالیف میں شدید اضافہ کر دیا گیا ہے۔