غزہ – (مرکزاطلاعات فلسطین فاؤنڈیشن) اسلامی تحریک مزاحمت ’حماس‘ نے ثالثوں اور امن کونسل سے مطالبہ کیا ہے کہ وہ اپنی ذمہ داریاں پوری کریں اور قابض اسرائیل کو جنگ بندی معاہدے کے پہلے مرحلے میں اپنے تمام وعدوں کو نافذ کرنے، خلاف ورزیاں ختم کرنے، قتل و غارت اور فوجی پیش قدمی کے اقدامات روکنے، امریکی صدر ڈونلڈ ٹرمپ کے منصوبے کے دوسرے مرحلے کے روڈ میپ کی منظوری دینے اور اس کے نفاذ کے لیے ایک شیڈول تیار کرنے کا پابند بنائیں۔
مرکز اطلاعات فلسطین کو موصول ہوا یہ مطالبہ تحریک کے سربراہ خلیل الحیہ کی قیادت میں ایک اعلیٰ سطحی وفد کی طرف سے مصری سرپرستی میں غزہ کی پٹی میں جنگ بندی کے معاہدے کے ثالثوں اور ضامنوں کے ساتھ منعقدہ ایک ملاقات کے دوران سامنے آیا۔
ملاقات میں جنگ بندی کے معاہدے اور اس کے نفاذ کے راستے سے متعلق کئی اہم امور پر تبادلہ خیال کیا گیا، جبکہ تحریک کے وفد نے صدر ٹرمپ کے منصوبے کے دوسرے مرحلے کے روڈ میپ کی منظوری کی تصدیق کی، جسے امن کونسل کے رابطہ کار نکولے ملادی نوف اور ثالثوں نے پیش کیا تھا۔
تحریک نے واضح کیا کہ روڈ میپ کے لیے اس کی رضامندی فلسطینی عوام کے مفادات، مستقل جنگ بندی تک پہنچنے کی خواہش، غزہ کی پٹی سے قابض فوج کے مکمل انخلا، فوری اور مستقل امداد کی فراہمی، انتظامی کمیٹی کے کام کے آغاز، تعمیر نو، اور طے شدہ دیگر حقوق کے نفاذ کی بنیاد پر تھی۔
’حماس‘ نے جنگ بندی کے معاہدے کے پہلے مرحلے پر عمل درآمد کے لیے اپنی اور مزاحمت کی وابستگی کی تصدیق کی، جو شرم الشیخ میں طے پایا تھا، جس کا آغاز اسیران اور لاشوں کے تبادلے اور عسکری کارروائیوں کو روکنے سے ہوا۔
تحریک نے معاہدے کے پہلے مرحلے پر عمل درآمد نہ کرنے کی ذمہ داری قابض اسرائیل پر ڈالی، اور اس بات کی نشاندہی کی کہ وہ میدان میں عسکری کشیدگی کو جاری رکھے ہوئے ہے اور غزہ کی پٹی میں انسانی بحران کو گہرا کر رہا ہے، اس کے ساتھ ساتھ اس نے روڈ میپ کو صریح طور پر مسترد کرنے کا اعلان بھی کیا ہے۔
