غزہ – (مرکزاطلاعات فلسطین فاؤنڈیشن) اسلامی تحریک مزاحمت ’حماس‘ نے منگل کے روز اپنے ایک بیان میں کہا ہے کہ اقوام متحدہ اور یورپی یونین کی جانب سے غزہ کی پٹی میں ہونے والے نقصانات اور ضروریات کے جائزے پر مبنی رپورٹ ان بے مثال انسانی اور معاشی لرزہ خیز حالات کی تصدیق کرتی ہے جو قابض اسرائیل کی وحشیانہ نسل کشی کے نتیجے میں پیدا ہوئے ہیں۔ حماس نے زور دے کر کہا کہ یہ رپورٹ عالمی برادری سے فوری اور موثر مداخلت کا تقاضا کرتی ہے۔
حماس نے منگل کو جاری کردہ اپنے بیان میں مزید کہا کہ رپورٹ میں تعمیر نو کے لیے 71 ارب ڈالر سے زائد کی رقم کا تخمینہ اور بنیادی خدمات کی بحالی سمیت اہم انفراسٹرکچر کی فوری تعمیر نو کے لیے بحالی پروگرام کے آغاز کی ضرورت اس بات کا ثبوت ہے کہ غزہ کی پٹی میں انسانی صورتحال کس قدر سنگین ہو چکی ہے۔ اس وقت سوا دو ملین سے زائد انسان زندگی کی بنیادی ترین سہولیات سے محروم ہو کر موت اور زندگی کی کشمکش میں مبتلا ہیں۔
بیان میں اس بات پر سخت تشویش کا اظہار کیا گیا کہ قابض اسرائیل ایک منظم منصوبے کے تحت غزہ کی پٹی میں ہمارے عوام کی تکالیف میں اضافہ کر رہا ہے اور زندگی کے بنیادی ڈھانچے کی بحالی و تعمیر نو کی ہر کوشش کو روک رہا ہے۔ یہ دراصل اسی وحشیانہ نسل کشی کا تسلسل ہے جس کا مقصد فلسطینی انسان کو نشانہ بنانا اور اس کی اپنی سرزمین پر اس کے وجود کو مٹانا ہے۔
حماس نے اقوام متحدہ، عرب ممالک، یورپی یونین اور ثالثوں سے مطالبہ کیا ہے کہ وہ غزہ کی پٹی کی تعمیر نو کے لیے ایک لازمی اور پابند طریقہ کار وضع کرنے کے لیے دباؤ ڈالیں۔ حماس نے ایک موثر بین الاقوامی موقف اپنانے پر زور دیا تاکہ دہشت گرد قابض حکومت کی جانب سے معصوم شہریوں کی تکالیف اور امدادی کاموں کو سیاسی مقاصد کے لیے استعمال کرنے کے عمل کو روکا جا سکے، اور اسے سیز فائر معاہدے کے تحت انسانی پہلوؤں سے متعلق اپنی ذمہ داریاں پوری کرنے پر مجبور کیا جا سکے۔
پیر کے روز جاری ہونے والی ایک بین الاقوامی رپورٹ میں بتایا گیا ہے کہ قابض اسرائیل کی نسل کشی کی جنگ کے نتیجے میں ہونے والی وسیع پیمانے پر تباہی کے بعد غزہ کی پٹی کی بحالی اور تعمیر نو کے لیے تخمینہ لاگت 71.4 ارب ڈالر تک پہنچ گئی ہے۔ رپورٹ میں انسانی اور ادارہ جاتی سطح پر تعمیر نو کی راہ میں حائل بڑے چیلنجوں کی جانب بھی اشارہ کیا گیا ہے۔
یہ تخمینے نقصانات، معاشی نقصانات اور بحالی کی ضروریات کے حتمی جائزے کا حصہ ہیں جسے یورپی یونین اور اقوام متحدہ نے ورلڈ بینک کے تعاون سے تیار کیا ہے۔ رپورٹ میں واضح کیا گیا ہے کہ یہ لاگت اگلے ایک عشرے پر محیط ہے، تاہم پہلے 18 ماہ کے دوران بنیادی خدمات کی بحالی، انفراسٹرکچر کی تعمیر اور معاشی بحالی کے لیے فوری طور پر تقریباً 26.3 ارب ڈالر کی ضرورت ہوگی۔
