حسنی مبارک سےاستعفیٰ لے کر مصری عوام نے نئی تاریخ رقم کر دی:ھنیہ

فلسطینی محاصرہ زدہ شہرغزہ کی پٹی میں اسلامی تحریک مزاحمت “حماس” کی حکومت کے وزیراعظم اسماعیل ھنیہ نے مصر میں صدرحسنی مبارک کے تیس سالہ دور اقتدار کے خاتمے کومصری قوم کی فتح عظیم قرار دیا ہے. ان کا کہنا ہے کہ مصریوں نے حسنی مبارک کواستعفیٰ دینے پر مجبور کر کے ایک نئی تاریخ رقم کردی ہے. مرکزاطلاعات فلسطین کے مطابق فلسطینی وزیراعظم نے غزہ میں ایک نیوز کانفرنس میں کہا کہ مصری عوام نے صدرحسنی مبارک کو استعفیٰ دینے پر مجبور کر کے اپنے زندہ ضمیر کا ثبوت دیا ہے. مصرمیں صرف سیاسی تبدیلی نہیں بلکہ عوامی انقلاب آرہا ہے جس کے خطے پروسیع اور دوررس اثرات مرتب ہوں گے. اسماعیل ھنیہ نے حماس اور فلسطینی عوام کی جانب سے مصری عوام کو دل کی اتھاہ گہرائیوں سے کامیاب انقلاب پر مبارک باد پیش کی. ادھر فلسطینی مجلس قانون ساز کے ڈپٹی اسپیکر ڈاکٹر احمد بحر نے بھی مصرمیں صدرحسنی مبارک کے نظام کے خاتمے کو تاریخ کا اہم ترین واقعہ قرار دیا ہے. ایک بیان میں احمد بحر نے کہا کہ مصرمیں آنے والے انقلاب سے پوری دنیا خوف زدہ ہے اور سب سے زیادہ خوف صہیونی دشمن کو ہے جو خطے میں اپنے استبدادی عزائم رکھتا ہے.