اوباما غزہ کی ناکہ بندی ختم کرانے کیلئے اسرائیل پر دباؤ ڈالیں: امریکی کانگریس

امریکی کانگریس نے امریکا کے صدر باراک اوباما سے مطالبہ کیا ہے کہ وہ غزہ کی ناکہ بندی ختم کرانے کیلئے اسرائیل پر دباؤ ڈالیں کیونکہ اسرائیل نے کم و بیش چار برسوں سے غزہ کا محاصرہ کیا ہوا ہے- امریکی کانگریس کے چوون ممبران نے بیان پر دستخط کیے ہیں جن کے مطابق اسرائیل نے غزہ کا کم وبیش چار برسوں سے محاصرہ کیا ہوا ہے اور اب یہ محاصرہ ختم ہونا چاہیے کیونکہ اس ناکہ بندی کی وجہ سے اہل غزہ انتہائی مشکلات کا شکار ہیں – ناکہ بندی کی وجہ سے اہل غزہ کی مدد کیلئے آنے والے قافلوں کو بھی مشکلات کا سامنا کرنا پڑتا ہے-منگل کے روز’’ سوا ریڈیو ‘‘کے مطابق دستخط شدہ بیان میں واضح کیا گیا ہے کہ غزہ کی ناکہ بندی کی وجہ سے سولہ لاکھ فلسطینیوں کی زندگیوں کو اسرائیل نے بلاوجہ مشکل میں ڈالا ہوا ہے- بیان میں انسانی حقوق کی تنظیموں اور ریلیف اداروں نے دستخط کیے ہیں- بیان میں مزید کہا گیا ہے کہ سال 2009کے آغاز میں اسرائیل کی مسلط کردہ جنگ کے نتیجے میں غزہ کو ناقابل تلافی نقصان ہوا اور غزہ کی تعمیر نو کیلئے تین سو ملین ڈالرز کی امداد کا مطالبہ کیا گیا ہے-