امریکا نے اسرائیل کو ایٹمی تعاون کی یقین دہانی کرا دی

عبرانی ذرائع ابلاغ نے امریکا کی جانب سے اسرائیل کو بھیجے گئے ایک خفیہ خط سے پردہ اٹھایا ہے جس میں امریکا نے اسرائیل کو ایٹمی توانائی کے شعبے میں بھرپور تعاون کی یقین دہانی کروائی ہے۔ اسرائیلی فوج کے زیر انتظام عبرانی ریڈیو نے اپنی بدھ کی نشریات میں کہا ہے کہ ’’امریکا نے اسرائیل کی جانب ایک خفیہ پیغام بھیجا ہے جس میں دونوں جانب سے سول مقاصد کے لیے ایٹمی توانائی کے میدان میں پورے تعاون کی یقین دہانی کروائی گئی ہے۔ دلچسپ بات یہ ہے کہ صہیونی ریاست کے لیے حالیہ امریکی تسلی اس کی جانب سے ایٹمی عدم پھیلاؤ کے معاہدے پر دستخط نہ کرنے کے علی الرغم سامنے آئی ہے۔ ریڈیو کے مطابق امریکا نے اپنے خط میں یہ عہد کیا ہے کہ وہ اسرائیل کے لیے بجلی کی پیدائش میں استعمال ہونے والے نیوکلئیر انتشار انگیز مواد کے ساتھ ساتھ نئی ٹکنالوجی اور مختلف آلات بھی خریدے گا، اس خفیہ خط میں امریکی انتظامیہ کی جانب سے اسرائیل کی حوصلہ افزائی پر مشتمل عوامی بیانات دینے کا وعدہ بھی کیا گیا ان بیانات میں امریکا اسرائیل کو ایک ذمہ دار اور صبر وبرداشت والا ملک قرار دے گا۔ یہ انکشاف ایک ایسے وقت میں سامنے آیا ہے جب امریکی صدر نے ان خبروں کی تردید کر دی ہے جس کے مطابق امریکا اسرائیل پر ایٹمی عدم پھیلاؤ کے معاہدے پر دستخط کے لیے دباؤ ڈالنے کا ارادہ رکھتا ہے۔ دوسری جانب امریکی صدر اسرائیلی وزیراعظم کے ساتھ ایک پریس کانفرنس میں یہ بھی کہ چکے ہیں کہ ’’امریکا تا ابد اسرائیل سے اپنی سیکیورٹی کی قیمت پر کچھ کرنے کا مطالبہ نہیں کریگا‘‘