الکرمل آتشزدگی سے اموات کی تعداد 43 ہو گئی ہے

مقبوضہ فلسطین کے شہر حیفا میں جبل کرمل کے مقام پر جمعرات کو لگنے والی آگ سے اموات کی تعداد 43 تک پہنچ گئی ہے۔ آتشزدگی کے اسباب کے بارے میں موصولہ اطلاعات کے مطابق آگ مناورہ اور ’’مارگالیٹ‘‘ کے دو دیہاتوں کی درمیانی راہ گذر پر موجود مائن فیلڈ میں بھڑکی ہے۔ مقامی ذرائع کے مطابق مارگالیٹ اور مناورہ کے گاؤں کے درمیان 886 نمبر رستے پر قائم مائن فیلڈ میں خوفناک آگ اس وقت بھڑک اٹھی جب کسانوں نے روز مرہ کا ایندھن جلانے کی کوشش کی۔ حالیہ پیش رفت کے بعد صہیونی پولیس ذرائع کے آگ جان بوجھ کر لگائے جانے کے دعوے کی نفی بھی ہو گئی ہے۔ پولیس کے کمشنر جنرل کے آفس سے جاری ہونے والے بیان کے مطابق پولیس کی ابتدائی تفتیش سے یہ بات سامنے آئی ہے کہ آگ جان بوجھ نہیں لگائی گئی بلکہ یہ سانحہ لاپرواہی کا شاخسانہ ہے۔ الکرمل 40 ہزار ایکڑ سے زائد رقبے پر پھیل جانے والی اس ہولناک آتشزدگی پر قابو پانے کی کوششوں میں اسرائیل کے علاوہ دیگر ممالک کی امدادی ٹیموں نے بھی حصہ لیا ہے۔ حیفا میں لگی آگ پر قابو پانے کے لیے مختلف ممالک کے آٹھ طیاروں اور تین ہیلی کاپٹروں نے بھی امدادی کاموں میں حصہ لیا، جبکہ اسرائیلیوں کے علاوہ فلسطینی اوراردنی امدادی ٹیمیں بھی امدادی کاموں مصروف دکھائی دیں. دیگر ممالک میں روس، فرانس، آذر بائیجان اور اٹلی کی امدادی ٹیمیں شامل تھیں.