مقبوضہ بیت المقدس – (مرکزاطلاعات فلسطین فاؤنڈیشن) مقبوضہ بیت المقدس شہر نے جولائی سنہ 2026ء کے دوران ایک وسیع اسرائیلی کشیدگی کا مشاہدہ کیا جس نے مسجد اقصی اور شہر میں فلسطینی وجود کو نشانہ بنایا۔ یہ کشیدگی قتل، گرفتاریوں، مسماری، بستیوں کی تعمیر، املاک پر قبضے اور یہودی آباد کاروں کے ریکارڈ توڑ دھاووں کے ذریعے سامنے آئی، اس کے ساتھ ساتھ نمازیوں پر سخت پابندیاں بھی عائد کی گئیں۔ یہ سب کچھ القدس کی شناخت اور اس کی مذہبی اور آبادیاتی حقیقت کو تبدیل کرنے کی مسلسل پالیسی کا حصہ ہے۔
القدس گورنری، معراج پلیٹ فارم اور وادی حلوہ انفارمیشن سینٹر کی جاری کردہ رپورٹوں سے ظاہر ہوا ہے کہ گذشتہ ماہ تین فلسطینی شہید ہوئے، جن میں ولید نضال ابو سنینہ (عمر16 سال)، نصر زعل کعابنہ (عمر 20 سال) اور خلیل رشاد الرشق (عمر 47 سال) شامل ہیں۔
رپورٹوں میں واضح کیا گیا ہے کہ ابو سنینہ قلندیا کیمپ پر چھاپے کے دوران ایک سنائپر کی گولی سے شہید ہوئے، جبکہ کعابنہ بیرنبالہ قصبے میں دیوارِ فاصل کے قریب شہید ہوئے۔ قابض افواج نے شعفاط کیمپ چوکی کے قریب الرشق پر گولیاں چلائیں، جس کے بعد انہیں طبی امداد دینے سے روکا اور ان کی میت قبضے میں لے لی۔
بیت المقدس کے اداروں نے براہِ راست گولیوں، ربڑ کی گولیوں، گیس کےمہلک بموں اور مار پیٹ سے 23 فلسطینیوں کے زخمی ہونے کو ریکارڈ کیا، اس کے علاوہ یہودی آباد کاروں کی طرف سے القدس کے کئی قصبوں اور محلوں میں کیے گئے حملے بھی شامل ہیں۔
مسجد اقصی کشیدگی کے مرکز میں
جولائی کے دوران پامالیوں کے منظر نامے میں مسجد اقصی سرفہرست رہی، جہاں 9670 سے 9848 یہودی آباد کار داخل ہوئے، اس کے علاوہ ساڑھے چار ہزار سے زیادہ افراد نے “سیاحت” کے نام پر دراندازی کی ۔ یہ دھاوے 22 دنوں تک جاری رہے۔
ان دھاووں کے دوران علانیہ تلمودی رسومات ادا کی گئیں جن میں سجدہ ریزی، لیٹنا، گانا اور رقص شامل تھا، نیز مسجد کے صحنوں میں یہودی مذہبی کتابیں، لباس اور آلات لائے گئے۔
23 جولائی کو سنہ 1967ء میں القدس پر قبضے کے بعد سے دھاووں کی سب سے زیادہ شدت ریکارڈ کی گئی، جب 4822 سے زائد یہودی آباد کاروں نے مسجد اقصی پر دھاوا بولا، جن میں وزراء، کنیست کے ارکان، ربی اور “ہیکل” گروہوں کے رہنما شامل تھے۔
اس کے ساتھ ساتھ قابض افواج نے مسلمان نمازیوں کے داخلے پر سخت پابندیاں عائد کیں، مسجد کے کئی دروازے بند کر دیے، مردوں کی مخصوص عمر کے گروپوں کو وہاں پہنچنے سے روکا، اور آنے والوں کے شناختی کارڈز کی جانچ پڑتال کی۔
اس مہینے ایک غیر معمولی پیش رفت دیکھنے میں آئی جب مسجد اقصی کو ذاتی تقریبات کے لیے استعمال کیا گیا، جب ایک یہودی آباد کار کی جانب سے قابض پولیس کی حفاظت میں مسجد کے صحنوں کے اندر اپنی منگنی کا اعلان کرنے کی دستاویز سامنے آئی۔
گرفتاریاں، مسماری اور بستیاں
قابض افواج نے القدس میں گرفتاریوں اور چھاپہ مار مہمات جاری رکھیں۔ وادی حلوہ انفارمیشن سینٹر نے تقریباً 200 گرفتاریوں کو دستاویزی شکل دی، جن میں درجنوں مزدور اور مغربی کنارے کے شناختی کارڈ رکھنے والے افراد شامل تھے۔
گرفتاریاں القدس اور فلسطینی علاقوں کے مفتی شیخ محمد حسین تک پہنچ گئیں، جنہیں مسجد اقصی میں جمعہ کی نماز کے بعد گرفتار کیا گیا، بعد ازاں انہیں رہا کر کے ایک ہفتے کے لیے مسجد سے دور رہنے کا حکم دیا گیا۔
قابض حکام نے درجنوں انتظامی حراست کے احکامات، گھر میں نظر بندی اور مسجد اقصی اور پرانے شہر سے بے دخلی کے فیصلے جاری کیے، جس کے ساتھ ساتھ شہر کے محلوں اور قصبوں میں 200 کے قریب چھاپہ مار کارروائیاں کی گئیں۔
قابض حکام نے 29 مسماری اور کھدائی کے آپریشنز کیے، جن میں 14 خود ساختہ مسماری کے واقعات شامل تھے جن پر گھروں اور تنصیبات کے مالکان کو بھاری جرمانوں سے بچنے کے لیے مجبور کیا گیا۔
مسماری کے یہ آپریشنز سلوان، جبل المکبر، بیت حنینا، صور باہر، الرام اور رافات میں گھروں، اپارٹمنٹس، دکانوں، زرعی تنصیبات، باڑوں اور دیواروں تک پھیلے ہوئے۔
یہودی آباد کاروں نے پرانے شہر میں الباشا خاندان کی جائیداد پر قبضہ کر لیا جس سے چھ فلسطینی خاندانوں کو نکالا گیا، انہوں نے سلوان میں الشعبانی خاندان کے ایک صحن پر بھی کنٹرول حاصل کر لیا، ساتھ ہی البستان کے محلے اور جبل المکبر میں زمینوں پر قبضے کے فیصلے بھی سامنے آئے۔
آباد کاری کے منصوبے اور مسلسل حملے
جولائی کے دوران قابض حکام نے نو آباد کاری کے منصوبوں اور اقدامات کو آگے بڑھایا، جن میں “معالیہ ادومیم” بستی اور ام لیسون کے علاقے میں سینکڑوں آباد کاری یونٹس کی تعمیر، نیز زمینوں پر قبضے اور الخان الاحمر، جبع اور النبی موسیٰ کے قریب غیر قانونی چوکیوں کا قیام شامل ہے۔
رپورٹوں میں یہودی آباد کاروں کے 43 حملے ریکارڈ کیے گئے، جن میں زمینوں اور زیتون کے درختوں کو آگ لگانا، گاڑیوں پر پتھراؤ، راستے بند کرنا، بدو برادریوں پر حملہ، اور بھیڑوں اور پانی کے ذرائع پر قبضے کی کوششیں شامل تھیں۔
جولائی کے مہینے کے خلاصے نے اس بات کی تصدیق کی کہ قابض حکام ایک مربوط پالیسی پر عمل پیرا ہیں جس کا مقصد مسجد الاقصی اور القدس میں آباد کاری کے وجود کو مضبوط کرنا ہے، جبکہ قتل، گرفتاری، مسماری، بستیوں کی تعمیر اور املاک پر قبضے کے ذریعے فلسطینی وجود کو کم کرنا ہے، تاکہ شہر کی شناخت اور اس کی تاریخی، مذہبی اور سیاسی حیثیت کو تبدیل کرنے کے لیے ایک نئی حقیقت مسلط کی جا سکے۔
