اسرائیل کے خلاف مزاحمت قومی فریضہ ہے: بشارالاسد

شام کے صدر بشار الاسد نے کہا ہے کہ اسرائیل کے خلاف مزاحمت قومی فرض ہے اور اس کی حمایت و امداد اخلاقی اور قانونی فرض ہے- انہوں نے ترکی کے شہر استنبول میں اسلامی کانفرنس تنظیم کی اقتصادی و تجارتی کمیٹی کے اجلاس میں خطاب کرتے ہوئے کہا کہ’’ ہماری معیشت ہمارے وجود سے منسلک ہے – ہم نے آج تک جن چیلنجز کا سامنا کیا ہے وہ ایک حقیقت ہیں- ہم نے چالیس سال قبل اس وقت خطرہ کو محسوس کرلیا تھا جب مسجد اقصی کو جلانے کی سازش کی گئی -‘‘ بشارالاسد نے کہا کہ آج بھی مقبوضہ بیت المقدس کو یہودیانے اور مسجداقصی کوشہید کرنے کی سازشیں جاری ہیں- فلسطینیوں کا قتل عام کیا جا رہا ہے- فلسطینیوں کو ان کے گھروں سے بے دخل کر کے ان کی جگہ یہودیوں کو آباد کیا جا رہا ہے- شام کے صدرنے ذکر کیا ہے کہ واقعات نے ثابت کر دیا ہے کہ صرف مذمتی قرار دادیں پاس کرنا مسئلے کا حل نہیں ہے- مذمتی بیانات کی کوئی قیمت نہیں- اسرائیل کی چاپلوسی کرنے کے بجائے اس پر دباؤ ڈالنا چاہیے – مراحمت کے بغیر اسرائیل اپنے اقدامات سے بازار آنے والا نہیں- انہوں نے کہا کہ ان کا یہ مقصد نہیں کہ وہ قیام امن نہیں چاہتے، بلکہ جب تک گولان کی پہاڑیوں سمیت تمام مقبوضہ اراضی خالی نہیں کردی جاتی قیام امن کا امکان نہیں-