اسرائیل نے مغربی کنارے سے 14 فلسطینی گرفتار کر لیے

مغربی کنارے کے مختلف اضلاع میں اسرائیلی فوج نے اپنی تازہ پکڑ دھکڑ مہم میں کم از کم 14 فلسطینی شہریوں کو گرفتار کرلیا ہے۔ عبرانی ریڈیو نے اسرائیلی فوج کے حوالے سے بتایا کہ یہ لوگ فوج کو مطوب تھے فوجی ذرائع نے گرفتارشدگان کو نامعلوم مقام منتقل کر دیا ہے۔ دوسری جانب شمالی اور جنوبی مغربی کنارے مقامی ذرائع نے بتایا کہ صہیونی فوج نے جنوی ضلع الخلیل کے علاقے بلدہ اذٓنا سے دو شہریوں کو گرفتار کر کے بہیمانہ تشدد کا نشانہ بنایا ہے۔ عینی شاہدین نے بتایا کہ الخلیل کے مغربی علاقے بلدہ اذنا میں فوجی اہلکاروں نے 26 سالہ سامر عیسی عوض اور 19 سالہ صدام عیسی طمیزی کے گھروں پر دھاوا بولا۔ کارروائی کے دوران ان کے گھروں میں بڑے پیمانے پر توڑ پھوڑ کی گئی۔ جنین کیمپ میں بھی اسرائیلی فوج نے چھاپہ مار کارروائی کر کے تین شہریوں کو اغوا کیا ہے۔ مقامی ذرائع نے بتایا کہ فوج نے حملہ کیا اور گھروں میں توڑ پھوڑ کر کے یوسف عماد عامر، میسرہ سلیمان خوبوش اور وسام سالم جلامنہ کو اغوا کر کے نامعلوم مقام منتقل کر دیا۔ اس موقع پر اسرائیلی فوج گھروں کی تلاشی لیتی رہی اور فوج نے آواز پیدا کرنے والے شیل بھی برسائے۔ وادی برقین کے مقامی ذرائع کے مطابق وہاں بھی اسرائیلی گاڑیاں گھنٹوں تک علاقے میں گردش کرتی رہیں۔ خیال رہے کہ گزشتہ روز بھی اسرائیل نے 12 شہریوں کو اغوا کیا تھا جن میں فلسطینی مجلس قانون ساز کے رکن جمال نتشہ بھی شامل تھے۔